अंजली पेट्रोल पंपासमोर वाळूच्या टेम्पोचा अपघात; ३.०६ लाखांचा मुद्देमाल जप्त!

टेम्पोत एक ब्रास वाळू; गंगापूर पोलिसांत अज्ञात चालकाविरुद्ध गुन्हा दाखल, चालक फरार

लोकार्थ प्रतिनिधी विजय बनसोड गंगापूर

गंगापूर ते भेंडाळा रोडवरील अंजली पेट्रोल पंपासमोर वाळू वाहतूक करणाऱ्या टाटा ४०७ टेम्पोचा अपघात झाल्याची घटना २३ ऑक्टोबर रोजी रात्री घडली. या टेम्पोमध्ये अंदाजे एक ब्रास वाळू आढळून आली. शासनाचा महसूल बुडवून वाळूची चोरटी विक्री करण्याच्या उद्देशाने वाहतूक केल्याच्या आरोपावरून गंगापूर पोलिसांनी अज्ञात चालकाविरुद्ध गुन्हा दाखल केला असून, चालक फरार आहे.

पोलिसांनी दिलेल्या माहितीनुसार, गंगापूर ते भेंडाळा रोडवरील अंजली पेट्रोल पंपासमोर अपघातग्रस्त अवस्थेत पिवळ्या रंगाचा टाटा कंपनीचा ४०७ टेम्पो (क्रमांक एमएच ०४ सीए ८११५) आढळून आला. अपघातामुळे टेम्पोची समोरील दोन्ही चाके बाजूला झालेली होती, तर समोरील बॉडीचे नुकसान झाले होते. या वाहनाच्या मालवाहू हौदामध्ये अंदाजे एक ब्रास वाळू आढळली.

पोलिसांनी सुमारे तीन लाख रुपये किमतीचा टेम्पो आणि सहा हजार रुपये किमतीची वाळू असा एकूण तीन लाख सहा हजार रुपयांचा मुद्देमाल जप्त केला आहे. या प्रकरणी पोलीस कर्मचारी पदमकुमार मोहन जाधव यांनी दिलेल्या फिर्यादीवरून २४ ऑक्टोबर रोजी गंगापूर पोलीस ठाण्यात भारतीय न्याय संहिता २०२३ च्या कलम ३०३(२) नुसार गुन्हा दाखल करण्यात आला आहे.

या प्रकरणातील टेम्पो चालकाची ओळख अद्याप पटलेली नसून, त्याचा शोध सुरू आहे. पुढील तपास पोलीस अंमलदार जाधव करीत आहेत.