अंबड पोलीस ठाण्यासमोर अखेर गतिरोधक!पाचोड रस्त्यावर राज्य महामार्ग विभागाची कार्यवाही

अंबड पोलीस ठाण्यासमोर अखेर गतिरोधक!. पाचोड रस्त्यावर राज्य महामार्ग विभागाची कार्यवाही

लोकार्थ प्रतिनिधी पंकज पवार

अंबड – शहरातील पाचोड रस्त्यावर पोलीस ठाण्यासमोरील चौकात वारंवार होणाऱ्या अपघातांच्या पार्श्वभूमीवर अखेर राज्य महामार्ग विभागाने गतिरोधक बसविले आहेत. शुक्रवार, दि. १६ ऑक्टोबर रोजी ही कार्यवाही करण्यात आली. त्यामुळे या मार्गावरील वाहनांच्या वेगावर नियंत्रण येऊन अपघातांची शक्यता कमी होण्यास मदत होणार आहे.
अंबड-पाचोड रस्त्यावर शहरांतर्गत तसेच बाहेरगावाहून येणाऱ्या वाहनांची वर्दळ मोठ्या प्रमाणात वाढली आहे. या मार्गावरून जड वाहनांचीही वाहतूक होत असल्याने पोलीस ठाण्यासमोरील चौकात वारंवार अपघात घडत होते. या ठिकाणी आठवड्यातून दोन ते तीन वेळा अपघात होत असल्याने नागरिकांमध्ये चिंतेचे वातावरण होते. त्यामुळे या चौकात गतिरोधक बसविण्याची मागणी नागरिकांकडून अनेक दिवसांपासून केली जात होती.अंबड-पाचोड हा मार्ग आता छत्रपती संभाजीनगर ते परभणी या शहरांना जोडणारा महत्त्वाचा मार्ग बनला आहे. त्यामुळे या रस्त्यावरील वाहतुकीचा भार वाढला आहे. तसेच जालना-वडीगोद्री आणि पाचोड-घनसावंगी हे दोन प्रमुख मार्ग अंबड शहराला जोडलेले असल्याने शहरातील छत्रपती शिवाजी महाराज चौकासह प्रमुख रस्त्यांवर वाहनांची मोठी वर्दळ असते. अखेर नागरिकांच्या मागणीची दखल घेत पोलीस ठाण्यासमोरील चौकात गतिरोधक बसविण्यात आल्याने नागरिकांकडून समाधान व्यक्त होण्याची अपेक्षा आहे. मात्र, अपघात टाळण्यासाठी वाहनचालकांनी वेगमर्यादेचे पालन करावे, अशी अपेक्षा व्यक्त होत आहे.