धर्माबादमध्ये FDA चा छापा; १.८५ लाखांचा संशयास्पद अन्नसाठा जप्त!

लोकार्थ प्रतिनिधी विजय देऊळगावकर

धर्माबाद (नांदेड) : सणासुदीच्या काळात अन्नभेसळीविरोधात अन्न व औषध प्रशासनाने धडक कारवाई केली. धर्माबाद येथील मेसर्स किसान इंडस्ट्रीजवर २३ ऑक्टोबर रोजी छापा टाकून ८९८ किलो मिरची पावडर आणि ७१८ किलो खाण्याचे मीठ असा एकूण १ लाख ८५ हजार २६४ रुपये किमतीचा साठा जप्त करण्यात आला. कमी दर्जाचे व भेसळयुक्त असल्याच्या संशयावरून ही कारवाई करण्यात आली असून, संबंधित आस्थापनेचा अन्न परवाना निलंबित करण्यात आला आहे.
सय्यद मकबूल सय्यद हुसेन यांच्या किसान इंडस्ट्रीजमधून जप्त केलेल्या साठ्यात १ लाख ७९ हजार ५२० रुपये किमतीची मिरची पावडर आणि ५ हजार ७४४ रुपये किमतीच्या मिठाचा समावेश आहे. अन्न सुरक्षा अधिकारी ए. एम. तम्माडवार, व्ही. एस. लोंढे आणि एस. व्ही. श्रीराम यांच्या पथकाने ही कारवाई केली.
जप्त अन्नपदार्थांचे नमुने तपासणीसाठी प्रयोगशाळेत पाठविण्यात आले आहेत. अहवाल प्राप्त झाल्यानंतर पुढील कायदेशीर कारवाई केली जाणार असल्याची माहिती अन्न व औषध प्रशासनाने दिली.