लोकार्थ प्रतिनिधी छत्रपती संभाजीनगर आणि नांदेड
देगलूर : अन्न व औषध प्रशासनाने ‘सेफ फूड, सेफ महाराष्ट्र’ मोहिमेंतर्गत नांदेड जिल्ह्यातील एमआयडीसी खानापूर येथे मोठी कारवाई केली. मे. उमेश अग्रो इंडस्ट्रीज या खाद्यतेल रिपॅकिंग युनिटमधून भेसळीचा संशय असलेले १ हजार ५२८ किलो रिफाइंड सोयाबीन ऑईल (वारुणी गोल्ड) जप्त करण्यात आले. या साठ्याची किंमत ३ लाख ५ हजार ६८० रुपये आहे. तपासणीत गंभीर त्रुटी आढळल्याने संबंधित आस्थापनेचा अन्न व्यवसाय परवाना तात्काळ निलंबित करण्यात आला.
अन्न व औषध प्रशासनाच्या पथकाने २२ ऑक्टोबर रोजी मे. उमेश अग्रो इंडस्ट्रीज, एमआयडीसी खानापूर, ता. देगलूर येथे तपासणी केली. यावेळी खाद्यतेलाच्या गुणवत्तेबाबत संशय निर्माण झाल्याने १,५२८ किलो तेलाचा साठा जप्त करण्यात आला. तसेच आस्थापनेत स्वतःची प्रयोगशाळा नसल्याचे आणि अन्य गंभीर त्रुटी आढळून आल्याने प्रशासनाने परवाना निलंबित करण्याची कारवाई केली.
ही कारवाई सह आयुक्त (अन्न), छत्रपती संभाजीनगर येथील श्री. करकाळे यांच्या निर्देशानुसार आणि सहायक आयुक्त (अन्न), नांदेड परिमंडळ-२ येथील श्री. भरकड यांच्या मार्गदर्शनाखाली अन्न सुरक्षा अधिकारी व्ही. एस. लोंढे यांनी केली.
Other Articles
लोंबकळणाऱ्या विजेच्या तारामुळे सहा एकर ऊस जळून खाक
No Comment! Be the first one.