विहिरीत पडल्याने शेतकऱ्याचा मृत्यू चिकलठाण येथील हृदयद्रावक घटना

दोन मुलांच्या जाण्यानंतर कुटुंबाचा आधारवड हरपला कुटुंबावर दुःखाचा डोंगर

लोकार्थ प्रतिनिधी कार्तिक राजगुरु

कन्नड तालुक्यातील चिकलठाण येथे एक अत्यंत दुःखद आणि हृदयद्रावक घटना घडली आहे. येथील रहिवासी असलेले शेतकरी भगवान गणपत जाधव (वय ४९) यांचा विहिरीत पाय घसरून पडल्याने दुर्दैवी मृत्यू झाला आहे. ही घटना काल दिनांक २१ ऑक्टोबर रोजी बुधवारी सायंकाळी सहा वाजण्याच्या सुमारास घडली.
मिळालेल्या प्राथमिक माहितीनुसार, भगवान जाधव हे सायंकाळी शेतातील विहिरीजवळ झाड तोडत असताना त्यांचा अचानक पाय घसरला. तोल जाऊन ते थेट खोल विहिरीत कोसळले. आसपास कोणी नसल्याने काही वेळ मदतीसाठी कोणीच मिळाले नाही. नंतर काही ग्रामस्थांना या घटनेची माहिती मिळताच त्यांनी तात्काळ विहिरीकडे धाव घेत त्यांना त्यांना विहिरीबाहेर काढले आणि तात्काळ कन्नड येथील ग्रामीण रुग्णालयात उपचारासाठी दाखल केले. मात्र, तेथील वैद्यकीय अधिकाऱ्यांनी तपासणी करून त्यांना मृत घोषित केले.
घटनेची माहिती मिळताच कन्नड ग्रामीण पोलीस ठाण्याच्या पोलिसांनी रुग्णालयात धाव घेऊन पंचनामा केला. याबाबत अकस्मात मृत्यूची नोंद करण्यात आली असून पुढील तपास पोलीस करत आहेत.

दोन मुलांच्या जाण्यानंतर कुटुंबाचा आधारवड हरपला
भगवान जाधव हे अत्यंत मनमिळावू आणि कष्टाळू शेतकरी म्हणून चिकलठाण परिसरात परिचित होते. अत्यंत दुर्दैवी बाब म्हणजे दोन वर्षांपूर्वी त्यांच्या मुलगा व मुलगी यांचेही निधन झाले होते. आज घराचा आधारवड असलेल्या भगवान जाधव यांचे अचानक जाण्याने जाधव कुटुंबावर दुःखाचा डोंगर कोसळला आहे.
त्यांच्या पश्चात आई, पत्नी आणि तीन बहिणी असा परिवार आहे. कुटुंबाचा आधारच हरपल्याने सर्वत्र हळहळ व्यक्त होत आहे. त्यांच्या घरासमोर नातेवाईक आणि ग्रामस्थांनी मोठी गर्दी केली होती.
त्यांच्या पार्थिवावर अंत्यसंस्कार दि.२२ गुरुवार रोजी सकाळी ११ वाजता चिकलठाण येथील स्मशानभूमीतकरण्यात आले.यावेळी परिसरातील शेकडो ग्रामस्थ, नातेवाईक आणि मित्रपरिवार मोठ्या संख्येने उपस्थित होते.