सिडकोत पिस्तुलांचा धडाका! सहा जणांच्या टोळीकडून ४ देशी कट्टे अन् ११ जिवंत काडतुसे जप्त

लोकार्थ प्रतिनिधी विजय देऊळगावकर

छत्रपती संभाजीनगर : शहरात बेकायदा शस्त्र बाळगणाऱ्यांविरोधात सिडको पोलिसांनी मोठी कारवाई करत सहा जणांच्या मुसक्या आवळल्या आहेत. या आरोपींकडून चार देशी बनावटीची पिस्तुले आणि ११ जिवंत काडतुसे असा एकूण २ लाख २२ हजार रुपयांचा शस्त्रसाठा जप्त करण्यात आला. पोलिसांच्या या कारवाईमुळे शहरातील अवैध शस्त्र बाळगणाऱ्यांमध्ये खळबळ उडाली आहे.

२४ ऑक्टोबर रोजी सिडको पोलीस ठाण्याच्या गुन्हे प्रगटीकरण पथकाला गोपनीय बातमीदारामार्फत शिवा सुरे हा पिस्तूल आणि काडतुसे बाळगत असल्याची माहिती मिळाली. त्यानुसार पोलिसांनी जाधववाडीतील सुरेवाडी परिसरात शोध घेत शिवा सुरे याला ताब्यात घेतले. चौकशीत त्याने पिस्तूल मित्र सुमीत विसपुते याच्या घरी ठेवल्याची माहिती दिली. पोलिसांनी सुमीतच्या खोलीतून एक पिस्तूल आणि दोन जिवंत काडतुसे जप्त केली.

तपासाची चक्रे वेगाने फिरवत पोलिसांनी सत्यम चाटे याला ताब्यात घेतले. त्याच्याकडून एक पिस्तूल मिळाले. त्यानंतर अर्जुन लिंगायत याने जाधववाडीतील मोढा भागात लपवून ठेवलेली आणखी दोन पिस्तुले पोलिसांनी हस्तगत केली. पुढील चौकशीत श्रीकांत शिखरे आणि विशाल भोसले यांच्याकडे जिवंत काडतुसे असल्याचे समोर आले. पोलिसांनी श्रीकांतकडून पाच, तर विशालकडून चार जिवंत काडतुसे जप्त केली.

या कारवाईत शिवा अंबादास सुरे (२५), सुमीत सुनील विसपुते, सत्यम भास्कर चाटे (२३), अर्जुन किशोर लिंगायत (२०), श्रीकांत सतीश शिखरे (२४) आणि विशाल राजू भोसले (२४) या सहा जणांना अटक करण्यात आली आहे. यातील काही आरोपींविरुद्ध यापूर्वीही विविध पोलीस ठाण्यांत गुन्हे दाखल असल्याची माहिती पोलिसांनी दिली.

पोलीस आयुक्त प्रविण पवार, परिमंडळ-२ चे पोलीस उपायुक्त रत्नाकर नवले आणि सिडको विभागाचे सहायक पोलीस आयुक्त मनीष कल्याणकर यांच्या मार्गदर्शनाखाली वरिष्ठ पोलीस निरीक्षक अतुल येरमे, पोलीस उपनिरीक्षक अनिल नाणेकर आणि गुन्हे प्रगटीकरण पथकाने ही कारवाई केली. या प्रकरणाचा पुढील तपास पोलीस उपनिरीक्षक अनिल नाणेकर करीत आहेत.

चार पिस्तुले, ११ काडतुसे जप्त झाल्याने या शस्त्रसाठ्याचा वापर कशासाठी होणार होता आणि त्यामागे आणखी कोणी आहे का, याचा तपास आता पोलिसांकडून केला जात आहे.