सोयगावच्या प्रशासकीय इमारतीचे छत कोसळले; निकृष्ट बांधकामावर प्रश्नचिन्ह

७.५१ कोटींच्या इमारतीत तिसऱ्यांदा प्लास्टर कोसळले; उच्चस्तरीय चौकशीची नागरिकांची मागणी

लोकार्थ प्रतिनिधी अजय पाटील सोयगाव

सोयगाव : सोयगाव शहरातील नव्या मध्यवर्ती प्रशासकीय इमारतीच्या छताचे प्लास्टर कोसळल्याची घटना समोर आली आहे. दुष्काळग्रस्तांच्या पंचनाम्यांच्या आढावा बैठकीदरम्यान ही घटना घडली. बैठकीसाठी कर्मचारी उपस्थित असतानाच प्लास्टर कोसळल्याने परिसरात घबराट निर्माण झाली. सुदैवाने, या घटनेत कोणतीही जीवितहानी झाली नाही.

या प्रशासकीय इमारतीच्या बांधकामासाठी शासनाकडून ७ कोटी ५१ लाख ८९ हजार रुपयांचा निधी मंजूर करण्यात आला होता. मात्र, इमारत हस्तांतरित होण्यापूर्वीच भिंतींना मोठे तडे पडल्याचे आणि छताचे प्लास्टर कोसळल्याचे प्रकार घडल्याचा दावा करण्यात येत आहे. यापूर्वीही अशा घटना घडल्याने बांधकामाच्या दर्जाबाबत प्रश्न उपस्थित होत आहेत.

सार्वजनिक बांधकाम विभागाच्या देखरेखीखाली हे काम करण्यात आले असून, संबंधित कामाची गुणवत्ता, मोजमाप आणि तपासणीबाबत चौकशी करण्याची मागणी नागरिकांकडून होत आहे. या प्रकरणी उच्चस्तरीय चौकशी करून जबाबदारांवर कारवाई करावी, अशी मागणीही करण्यात आली आहे.

दरम्यान, इमारतीच्या दुरुस्तीबाबत सार्वजनिक बांधकाम विभाग काय पावले उचलणार, याकडे नागरिकांचे लक्ष लागले आहे.