दुष्काळात फायनान्सची हप्ते वसुली तत्काळ थांबवा-नसता मनसे आंदोलन छेडेल

जिल्हा सचिव विलास तिकांडे यांचा ईशारा

लोकार्थ प्रतिनिधी राहुल मुळे

जालना –जिल्ह्यत
दुष्काळी परिस्थिती गंभीर बनली असून, शेतकरी, शेतमजूर, दूध उत्पादक आणि लघुउद्योजक आर्थिक संकटात सापडले आहेत. या पार्श्वभूमीवर विविध फायनान्स कंपन्यांकडून सुरू असलेली कर्जाच्या हप्त्यांची वसुली तत्काळ थांबवावी, अशी मागणी मनसे पक्षाचे
जिल्हासचिव विलास तिकांडे यांनी जिल्हाधिकार्‍यांकडे निवेदनाद्वारे केली आहे.
शेतकरी, महिला शेतमजूर, दूध उत्पादक तसेच छोटे व्यावसायिक बचत गटांच्या माध्यमातून विविध फायनान्स संस्थांकडून कर्ज घेतात. या कर्जाची परतफेड दरमहा हप्त्यांच्या स्वरूपात केली जाते. संबंधित संस्थांचे अधिकारी गावोगावी जाऊन हप्त्यांची वसुली करतात. मात्र, सध्याच्या दुष्काळी परिस्थितीमुळे ठाामीण अर्थव्यवस्थेवर मोठा परिणाम झाला असून, कर्जदारांसमोर हप्ते भरण्याचे गंभीर संकट उभे राहिले आहे. पावसाअभावी शेतातील पिके करपून गेल्याने खुरपणी, खतांची फवारणी आणि इतर शेतीकामे ठप्प झाली आहेत. परिणामी, शेतमजुरांच्या रोजगारावरही परिणाम झाला आहे. खरीप हंगाम मोठ्या प्रमाणात वाया गेल्याने शेतकर्‍यांचे आर्थिक गणित बिघडले असून, आगामी रब्बी हंगामाबाबतही अनिश्चितता निर्माण झाली आहे. उत्पन्नाचे स्रोत कमी झाल्याने मायक्रो फायनान्सच्या कर्जाचे हप्ते आणि
त्यावरील व्याज भरणे कर्जदारांसाठी कठीण झाले आहे. हप्ते भरण्यासाठी पैसे उपलब्ध नसल्याने काही कर्जदारांना पुन्हा सावकारांकडून कर्ज घेण्याची वेळ येत आहे, तर काही कुटुंबांना कर्जफेडीसाठी घरातील सोने-नाणे किंवा पशुधन विकण्याची वेळ येण्याची भीती आहे.