जिल्हा रुग्णालयात १४.९१ लाखांचा घोटाळा! बनावट सही करून शासकीय निधी लाटला

सहायक अधीक्षकासह दोघांविरुद्ध गुन्हा; सिडको पोलिसांकडून तपास सुरू

लोकार्थ प्रतिनिधी विजय देऊळगावकर

छत्रपती संभाजीनगर : चिकलठाणा येथील जिल्हा सामान्य रुग्णालयात बनावट सही करून १४ लाख ९१ हजार २७२ रुपयांचा धनादेश दुसऱ्याच्या खात्यात जमा केल्याचा धक्कादायक प्रकार उघडकीस आला आहे. या प्रकरणी रुग्णालयातील सहायक अधीक्षक दीपक पुंडलीकराव जाधव आणि विजय रमेश उजेड यांच्याविरुद्ध सिडको पोलिस ठाण्यात शासकीय कार्यालयाची फसवणूक केल्याप्रकरणी गुन्हा दाखल करण्यात आला आहे.

पोलिसांनी दिलेल्या माहितीनुसार, १९ ऑक्टोबर २०२६ रोजी दुपारी १.२५ वाजण्याच्या सुमारास हा गैरव्यवहार झाल्याचे तक्रारीत नमूद आहे. रुग्णालयातील सहायक अधीक्षक दीपक जाधव यांनी प्रशासकीय अधिकारी तथा आहरण व संवितरण अधिकाऱ्यांची बनावट सही करून १४ लाख ९१ हजार २७२ रुपयांचा धनादेश विजय उजेड यांच्या नावे दिला. त्यानंतर ही रक्कम त्यांच्या बँक खात्यात जमा करण्यात आल्याचा आरोप आहे.

या प्रकारामुळे शासकीय कार्यालयाच्या बँक खात्यातील रकमेचा गैरवापर झाल्याचे समोर आले आहे. प्रशासकीय अधिकारी गुरुराज गोविंद जोशी यांनी दिलेल्या फिर्यादीवरून दोघांविरुद्ध गुन्हा दाखल करण्यात आला. या गैरव्यवहारात आणखी कोणाचा सहभाग आहे का, याचाही तपास करण्यात येणार आहे.