कर्जाच्या विवंचनेतून पार्डी सावळी येथील २१ वर्षीय तरुण शेतकऱ्याची आत्महत्या

सोयाबीनचे पीक वाया गेले; कर्जाच्या वाढत्या ओझ्याने कुटुंबावर दुःखाचा डोंगर

लोकार्थ प्रतिनिधी गोपाळ सातपुते

हिंगोली : सततची दुष्काळी परिस्थिती, शेतातील सोयाबीनचे पीक वाया जाणे आणि डोक्यावर वाढलेले कर्ज यामुळे आर्थिक संकटाचा सामना करणाऱ्या औंढा नागनाथ तालुक्यातील पार्डी सावळी येथील २१ वर्षीय तरुण शेतकऱ्याने आत्महत्या केल्याची दुर्दैवी घटना समोर आली आहे. सूरज श्यामराव सांगळे असे मृत तरुण शेतकऱ्याचे नाव असून, या घटनेमुळे पार्डी सावळी गावावर शोककळा पसरली आहे.

पीक हातचे गेले, कर्जाचा भार वाढला

मिळालेल्या माहितीनुसार, सूरज सांगळे आणि त्यांच्या वडिलांवर विविध बँकांचे कर्ज होते. चालू वर्षातील प्रतिकूल हवामान व दुष्काळी परिस्थितीमुळे शेतातील संपूर्ण सोयाबीनचे पीक वाया गेले. त्यामुळे अपेक्षित उत्पन्न मिळण्याची आशा मावळली. त्यातच घराच्या बांधकामासाठी घेतलेल्या कर्जाची परतफेड करण्याचे आव्हान कुटुंबासमोर उभे राहिले होते.

शेतीतून उत्पन्न मिळाले नाही आणि दुसरीकडे कर्जाचा भार वाढत असल्याने सूरज गेल्या काही दिवसांपासून आर्थिक विवंचनेत असल्याचे सांगण्यात येत आहे. कर्जाची परतफेड कशी करायची, या चिंतेतून तो वडिलांकडे वारंवार विचारणा करत असल्याची माहिती समोर आली आहे. तसेच कर्जवसुलीसाठी होत असलेल्या तगाद्यामुळे तो अधिकच अस्वस्थ झाला होता, असे वृत्त आहे.

राहत्या घरी घेतला टोकाचा निर्णय

आर्थिक अडचणी आणि कर्जाच्या चिंतेतून सूरजने मध्यरात्रीच्या सुमारास राहत्या घरी गळफास घेऊन आत्महत्या केल्याची माहिती आहे. सकाळी ही घटना उघडकीस आल्यानंतर गावात हळहळ व्यक्त करण्यात आली.

अवघ्या २१ वर्षांच्या तरुण शेतकऱ्याचा अशा प्रकारे मृत्यू झाल्याने सांगळे कुटुंबावर दुःखाचा डोंगर कोसळला आहे. या घटनेने परिसरात शोक व्यक्त केला जात असून, शेतकऱ्यांच्या आर्थिक अडचणी आणि कर्जाच्या प्रश्नावर पुन्हा एकदा चर्चा सुरू झाली आहे.

पोलिसांकडून पुढील कार्यवाही सुरू

घटनेची माहिती मिळताच पोलिसांनी घटनास्थळी भेट देऊन पुढील कार्यवाही सुरू केली आहे. आत्महत्येची नेमकी परिस्थिती आणि संबंधित बाबींचा तपास पोलिसांकडून करण्यात येत आहे