महानगरपालिकेतील भांडणांपेक्षा विकासकामांना प्राधान्य द्या; दुष्काळात पाण्याची व्यवस्था करा!

माजी नगराध्यक्ष भास्कर आंबेकर यांची मागणी

लोकार्थ प्रतिनिधी राहुल मुळे

जालना शहरात सध्या पावसाने दडी मारल्याने पाणीटंचाईचे संकट निर्माण होण्याची शक्यता आहे. अशा परिस्थितीत महानगरपालिकेने शहरातील नागरिकांना पाणी उपलब्ध करून देण्यासाठी योग्य नियोजन करावे. तसेच महानगरपालिकेतील अंतर्गत वाद आणि भांडणांमध्ये वेळ घालवण्यापेक्षा शहराच्या विकासकामांना प्राधान्य द्यावे, असे मत जालन्याचे माजी नगराध्यक्ष तथा शिवसेना नेते भास्कर आंबेकर यांनी व्यक्त केले.

जालना महानगरपालिकेत अधिकारी सत्ताधाऱ्यांचे ऐकण्यास तयार नसल्याची परिस्थिती निर्माण झाल्याचे सांगत, प्रशासन आणि लोकप्रतिनिधींमध्ये समन्वय असणे आवश्यक असल्याचे आंबेकर यांनी नमूद केले. शहराच्या विकासासाठी सर्वांनी एकत्रितपणे काम करण्याची गरज असून, आपापसांतील मतभेद बाजूला ठेवून नागरिकांच्या मूलभूत प्रश्नांकडे लक्ष देणे महत्त्वाचे असल्याचे त्यांनी सांगितले.
सध्या पावसाअभावी दुष्काळसदृश परिस्थिती निर्माण झाली असून, पाण्याचा प्रश्न गंभीर होण्यापूर्वीच महानगरपालिकेने उपाययोजना कराव्यात. शहरातील नागरिकांना नियमित आणि पुरेसा पाणीपुरवठा व्हावा, यासाठी पाण्याचे योग्य नियोजन करावे. आवश्यक त्या भागांत पर्यायी पाणीपुरवठ्याची व्यवस्था करून नागरिकांना दिलासा द्यावा, अशी मागणीही त्यांनी केली.
शहरातील रस्ते, पाणीपुरवठा, स्वच्छता आणि इतर मूलभूत सुविधांवर लक्ष केंद्रित करणे आवश्यक आहे. महानगरपालिकेतील वादांपेक्षा जनतेच्या समस्या सोडविणे आणि जालना शहराला विकासाच्या दिशेने पुढे नेणे हेच लोकप्रतिनिधी आणि प्रशासनाचे प्राधान्य असले पाहिजे, असे मत माजी नगराध्यक्ष भास्कर आंबेकर यांनी व्यक्त केले.