शेतकरी प्रश्नांसह ‘व्होट बचाओ, देश बचाओ’च्या मुद्द्यावर २७ ऑक्टोबरला हिंगोलीत काँग्रेसचे आंदोलन

शक्तिपीठ महामार्ग रद्द करणे, शेतकऱ्यांची कर्जमुक्ती, वीजपुरवठा आणि नैसर्गिक आपत्तीग्रस्त शेतकऱ्यांना मदतीची मागणी

लोकार्थ प्रतिनिधी गोपाळ सातपूते

हिंगोली | हिंगोली तालुका व शहर काँग्रेस कमिटीच्या वतीने शेतकरी प्रश्नांसह विविध जनहिताच्या मागण्यांसाठी मंगळवार, दिनांक २७ ऑक्टोबर २०२६ रोजी सकाळी १०.३० वाजता गांधी चौक, हिंगोली येथे बैठक व आंदोलन आयोजित करण्यात आले आहे. ‘व्होट बचाओ, देश बचाओ’ या मुद्द्यासह शेतकऱ्यांच्या विविध समस्यांकडे शासनाचे लक्ष वेधण्यासाठी हे आंदोलन करण्यात येणार आहे.

या आंदोलनात शक्तिपीठ महामार्ग रद्द करून त्यासाठी प्रस्तावित निधी शेतकऱ्यांची कर्जमुक्ती व दुष्काळ निवारणासाठी वापरणे, नियमित कर्जफेड करणाऱ्या शेतकऱ्यांनाही दोन लाख रुपयांचा लाभ देणे, शेतकऱ्यांना दिवसा व रात्रीच्या पाळीत नियमित वीजपुरवठा करणे, तसेच नैसर्गिक आपत्तीमुळे नुकसान झालेल्या शेतकऱ्यांना प्रतिहेक्टरी एक लाख रुपयांची मदत तातडीने त्यांच्या खात्यावर जमा करणे, अशा प्रमुख मागण्या मांडण्यात येणार आहेत.

शेतकऱ्यांच्या प्रश्नांवर शासनाचे लक्ष वेधणार

राज्यातील शेतकरी विविध नैसर्गिक संकटांना सामोरे जात असून, शेतीतील नुकसान आणि आर्थिक अडचणींमुळे शेतकऱ्यांवर आर्थिक ताण वाढत आहे. अशा परिस्थितीत शेतकऱ्यांना आर्थिक दिलासा देण्यासाठी शासनाने ठोस निर्णय घ्यावेत, अशी मागणी काँग्रेसच्या वतीने करण्यात येणार आहे.

शक्तिपीठ महामार्गासाठी होणाऱ्या खर्चाऐवजी शेतकऱ्यांची कर्जमुक्ती आणि दुष्काळ निवारणाला प्राधान्य द्यावे, नियमित कर्जफेड करणाऱ्या शेतकऱ्यांनाही दोन लाख रुपयांचा लाभ द्यावा आणि शेतीसाठी दिवसा व रात्री नियमित वीज उपलब्ध करून द्यावी, या मागण्यांवर आंदोलनात भर दिला जाणार आहे.

या आंदोलनात गुजरातचे आमदार श्री. अनंत जी पटेल , जिल्हाध्यक्ष डॉ. सतीश पाचपुते, महाराष्ट्र प्रदेश ओबीसी महासचिव विशाल घुगे, अल्पसंख्याक काँग्रेस मराठवाडा समन्वयक अ. हफिज अ. रहेमान, जैकी भाई कुरेशी, माजी जिल्हा काँग्रेस अध्यक्ष सुरेश आप्पा सराफ, माजी जिल्हा परिषद सदस्य शामराव जगताप, शेतकरी नेते डॉ. रमेश शिंदे, बाजीराव ईगोले पाटील, ओबीसी काँग्रेसचे जिल्हाध्यक्ष भास्करराव पोले नाईक, किसान काँग्रेसचे अध्यक्ष एकनाथ शिंदे, विशाल ईगोले, युवक प्रदेश सचिव बंटी भाऊ नागरे, युवक काँग्रेसचे हिंगोली जिल्हाध्यक्ष साईनाथ जाधव, अनुसूचित जाती-जमाती तालुका काँग्रेस अध्यक्ष समाधान टापरे यांच्यासह विठ्ठलराव पडघान, बापुराव पाटील वडदकर, जुबेर मामू, विठ्ठल मोहनकर, युवक हिंगोली तालुका अध्यक्ष दत्ताराव जाधव, बद्रीनाथ शिंदे, गोविंद लिबुळे आदी उपस्थित राहणार आहेत.