एन-२ परिसरात योगिराज हंस तीर्थ स्वामी महाराजांच्या पादुकांचे भक्तिभावाने पूजन

अनिरुद्ध महाराजांच्या मंत्रघोषात शेकडो घरांमध्ये पादुका पूजन; जय जगदंबच्या गजराने परिसर भक्तिमय

विजय देऊळगावकर

छत्रपती संभाजीनगर : सिडको एन-२ परिसरात योगिराज हंस तीर्थ स्वामी महाराज यांच्या पादुकांचे शेकडो घरांमध्ये भक्तिभावाने पूजन करण्यात आले. सकाळी ८ वाजता सुरू झालेल्या या पादुका पूजन सोहळ्याने जय भवानीनगर, विनय कॉलनी, महाजन कॉलनी, मुकुंदवाडी, नवीन एस.टी. कॉलनी, आदर्श कॉलनी यासह परिसरातील वातावरण भक्तिमय झाले.

जुनी एस.टी. कॉलनी येथे मनसेचे अशोक पुंडलिकराव पवार पाटील व सौ. अश्विनी अशोक पवार पाटील यांनी राहत्या घरी सपत्नीक पादुकांचे पूजन केले. तसेच आशानगर रेणुका माता मंदिरचे मुख्य दिनेश दिलीपलालजी जैस्वाल व सौ. दिनेश जैस्वाल, चिरंजीव बलराज जैस्वाल, सतीश वानखेडे व सौ. कल्पना वानखेडे, युवराज जैतमल व सौ. सुनंदा जैतमल यांच्या निवासस्थानीही पादुका पूजन करण्यात आले.

रेणुका माता मंदिरचे अनिरुद्ध महाराज यांच्या मंत्रघोषात आणि ‘जय जगदंब’च्या गजरात हा सोहळा पार पडला. ‘जय जगदंब’च्या जागराने परिसर दुमदुमून गेला. खंजिरी, झांज, ढोल-ताशांच्या गजरात पादुकांचे स्वागत करण्यात आले. यामुळे संपूर्ण एस.टी. कॉलनी परिसरात भक्तीमय वातावरण निर्माण झाले.