गंगापूरमध्ये केबल चोरी करणारे दोघे अटकेत; तांबे काढण्यासाठी वायर जाळली!

शिवाजीनगरातील घटना; २० हजार रुपये किमतीची ४०० फूट केबल चोरी, गंगापूर पोलिसांची कारवाई

लोकार्थ प्रतिनिधी विजय बनसोड

गंगापूर : गंगापूर शहरातील शिवाजीनगर परिसरातून सुमारे २० हजार रुपये किमतीची ४०० फूट केबल चोरी करणाऱ्या दोघांना गंगापूर पोलिसांनी अटक केली आहे. चोरी केलेल्या केबलमधील तांबे काढून विकण्याच्या उद्देशाने ती जाळून त्यात बदल केल्याचे तपासात समोर आले आहे. या कारवाईमुळे शहरातील चोरीच्या घटनांवर नियंत्रण आणण्यासाठी पोलिसांनी पावले उचलल्याचे दिसून येत आहे.

या प्रकरणी किरण वसंतराव सरोदे (वय ४७, रा. कऱ्हाळे गल्ली, गंगापूर) यांनी गंगापूर पोलिस ठाण्यात फिर्याद दिली. १७ ऑक्टोबर रोजी सकाळी सात वाजण्याच्या सुमारास शिवाजीनगर परिसरातून पॉलीकॅब कंपनीची २.५ एमएम, १.५ एमएम, १.० एमएम आणि ४.० एमएम आकाराची एकूण अंदाजे ४०० फूट केबल चोरीला गेली. या केबलची किंमत सुमारे २० हजार रुपये असल्याचे फिर्यादीत नमूद करण्यात आले आहे.

या प्रकरणी पोलिसांनी सलीम अय्युब पठाण (रा. जयसिंगनगर, गंगापूर) आणि तैजीफ मजीब शेख (रा. शिक्षक कॉलनी, गंगापूर) या दोघांना अटक केली आहे. चोरी केलेल्या केबलमधील तांबे विकण्याच्या उद्देशाने केबल जाळून तिचे स्वरूप बदलल्याचा आरोप त्यांच्यावर आहे.

याप्रकरणी भारतीय न्याय संहिता २०२३ च्या कलम ३०३(२) अन्वये गुन्हा दाखल करण्यात आला आहे. पोलिस निरीक्षक सलीम चाऊस यांच्या मार्गदर्शनाखाली पोलिस हेड कॉन्स्टेबल गणेश जाधव पुढील तपास करीत आहेत. गुन्हा दाखल करण्याची कार्यवाही पोलिस हेड कॉन्स्टेबल एम. व्ही. घोडके यांनी केली.