डॉ. बाबासाहेब आंबेडकरांनी वंचितांना मानवतावादी धम्माशी जोडले! — डॉ. प्रतिभा अहिरे

लोकार्थ प्रतिनिधी कार्तिक राजगुरु कन्नड

ज्यांच्या स्पर्शाचा विटाळ होता, ज्यांना शुद्रातीशुद्र गणल्या गेले अशा वंचितांना डॉ बाबासाहेब आंबेडकर यांनी बुद्ध धम्माच्या ओटीत टाकले. मानवतावादी धम्माशी जोडून वंचितांना वैश्विक केले असे प्रतिपादन विद्रोही कवयित्री डॉ. प्रतिभा अहिरे यांनी पितळखोरा येथे केले.
धम्मचक्र अनुप्रवर्तन दिनानिमित्ताने आशिया खंडातील सर्वात प्राचीन बुद्ध लेणी पितळखोरा येथे गेली २७ वर्षे महोत्सवाचे आयोजन करण्यात येते. या अंतर्गत धम्म चळवळ आणि आजचे वास्तव याविषयावर डॉ. प्रतिभा अहिरे यांचे व्याख्यान आयोजित करण्यात आले होते. यावेळी बोलताना त्या म्हणाल्या की, जयंती आणि उत्सव हे सोपस्कार म्हणून करायचे नसतात. सिंह जसा काही पावलं चालून गेल्यानंतर मागे वळून सिंहावलोकन करतो तसे आपण आपल्या चळवळीच्या वाटचालीचे भीमावलोकन केले पाहिजे. बुध्द होणे म्हणजे प्रज्ञा,करूणा,मैत्रीचा,विज्ञानवादाचा विचार आत्मसात करून तो आचरणात आणणे होय. बाबासाहेब आंबेडकरांनी वंचितांना विशाल मानवतावादी धम्माशी जोडून दिले आहे. त्याच्याशी आपले ईमान आवश्यक आहे. पोशाखी परिवर्तन बाबासाहेबांना अभिप्रेत नाही. अहंकार,द्वेष यामुळे आपण परस्परांपासून तुटत चाललो आहोत. तथागत गौतम बुद्धांनी भारद्वाजाला उपदेश करताना सांगितले की, आपण दुसऱ्याने दिलेले भोजन स्विकारले नाही तर ते भोजन त्याच्याकडेच राहते. द्वेष,शिव्या आपण स्विकारल्याच नाहीत तर त्या देणार्याकडेच राहतात. यावेळी नगराध्यक्ष फरीन बेगम अब्दुल जावेद या आपल्या भाषणात म्हणाल्या की,जयभीम,नमोबुध्दाय या केवळ घोषणा नाहीत तर तो मानवतेचा संदेश आहे. बाबासाहेब आंबेडकरांनी संविधान दिले नसते तर माझ्यासारख्या सामान्य महिलेला नगराध्यक्ष पदी विराजमान होण्याची संधी मिळाली नसती. सगळ्यांशी मैत्री पुर्ण व्यवहार करणे हाच बुध्द धम्माचा संदेश आहे. महोत्सवाचे उद्घाटन आमदार संजना जाधव यांच्या हस्ते झाले. यावेळी बोलताना आमदार जाधव म्हणाल्या की, कन्नड तालुक्याला पितळखोरा हा अमूल्य वारसा लाभला आहे. हा जागतिक सांस्कृतिक, ऐतिहासिक वारसा आहे.त्याच्या विकासासाठी यथोचित आर्थिक मदत करण्यात येईल.यावेळी सामुदायिक बुध्दवंदना भंते उपाली बोधी यांनी घेतली. कार्यक्रमाच्या अध्यक्षस्थानी मुद्रांक जिल्हाधिकारी गोरख सातदिवे हे होते. ते अध्यक्षीय भाषणात म्हणाले की, गेली सत्तावीस वर्षे पितळखोरा येथे धम्मचक्र अनुप्रवर्तन दिनानिमित्ताने उत्सव होत आहे. हा विचारांचा जागर पुढेही सुरू राहील यासाठी संघटन मजबूत करा.असे आवाहन केले. प्रमुख पाहुणे म्हणून रमेश धनेधर, राजू शेख कमीटी, माणिक आबा पगारे,अजय सातदिवे यांची उपस्थिती होती.
याप्रसंगी भीमराव खिल्लारे, कारभारी खिल्लारे, भास्कर देवरे, राजू खिल्लारे, रतन खिल्लारे, दगडू खिल्लारे ,माऊली यांच्या संचाने सादर केलेल्या भीम बुध्द गीतांनी चैतन्य निर्माण केले. कार्यक्रमाचे प्रास्ताविक धम्मचक्र अनुप्रवर्तन दिन व पितळखोरा महोत्सव समिती चे संयोजक अनिल शिरसाट यांनी केले. याप्रसंगी कृषी उत्पन्न बाजार समिती उपसभापती जयेश बोरसे, खरेदी विक्री संघाचे सभापती ज्ञानेश्वर निकम, कडूबा पवार,, अशोक वाहूळ , अमोल
सातदिवे,बाबासाहेब वाहूळ, राहुल सातदिवे, नाना शिरसाठ, राजू आवचार, अशोक जाधव, श्रीमती मनोहर, बाबासाहेब वाघ, प्रशांत बनकर, सुरज निकम, बापू मोरे , राहुल सातदिवे,गौतम जाधव , कैलास पगारे, साहेबराव भालेराव, राहुल बहिरव, रामराव बागुल सर, मनोज अळींग, ललीत मोहिते यांच्यासह जिल्ह्यातील विविध भागातून नागरिक उपस्थित होते. सुत्रसंचलन विनोद अंभोरे यांनी केले. आभार अमोल साळवे यांनी मानले.