दोन खुनांच्या गुन्ह्यातील कुख्यात मुजीब डॉन अखेर पोलिसांच्या जाळ्यात

छत्रपती संभाजीनगर / विजय देऊळगावकर

छत्रपती संभाजीनगर : दोन खुनांच्या गुन्ह्यात पोलिसांना हवा असलेला कुख्यात मुजीब ऊर्फ मुजीब डॉन अखेर शहर पोलिसांच्या हाती लागला आहे. सोमवारी (७ सप्टेंबर) शहर गुन्हे शाखेने सशस्त्र फौजफाट्यासह कारवाई करत मुजीब आणि त्याचा भाऊ सय्यद मोईन सय्यद मोईनोद्दीन यांना त्यांच्या अंसर कॉलनीतील घरातून अटक केली.

रेल्वे स्थानक उड्डाणपुलाखाली २ ऑक्टोबर २०२५ रोजी इम्रान सय्यद शफीक याचा खून करण्यात आला होता. या प्रकरणात मुजीबला यापूर्वी अटक झाली होती. मात्र, त्याचा भाऊ पोलिसांच्या हाती लागला नव्हता. त्यानंतर मुजीब जामिनावर बाहेर आला. पुढे शिल्‍लेगावजवळ झालेल्या खून प्रकरणातही त्याचा सहभाग आढळून आल्याने पोलिस त्याच्या शोधात होते.

पोलिसांची कारवाई टाळण्यासाठी मुजीबने घराच्या आवारात सीसीटीव्ही कॅमेरे बसवले होते. पोलिसांचे वाहन दिसताच तो पळून जाण्याचा प्रयत्न करीत असल्याची माहिती पोलिसांना मिळाली होती. मागील काही दिवसांपासून पोलिस त्याच्या हालचालींवर लक्ष ठेवून होते.

सोमवारी शहर गुन्हे शाखेचे वरिष्ठ पोलिस निरीक्षक अविनाश आघाव, सहायक पोलिस निरीक्षक प्रशांत गंभीरराव, पोलिस उपनिरीक्षक अर्जुन कदम यांच्या पथकाने सशस्त्र फौजफाट्यासह धडक कारवाई केली. यावेळी दोन्ही भावांना अटक करण्यात आली. पोलिस अंमलदार संतोष पारधे, संदीप तांडे, कैलास काकड, राजेंद्र साळुंके आणि श्रीकांत काळे यांनी कारवाईत सहभाग घेतला.