दोन गुन्हे, १५ दिवस न्यायालयीन कोठडी; तरीही अल्पवयीन मुलीचा पाठलाग सुरूच?

संदेश पवार याच्याविरुद्ध गंगापूरमध्ये तिसरा गुन्हा दाखल; महाविद्यालयापासून बसस्थानकापर्यंत पाठलाग केल्याची तक्रार

लोकार्थ प्रतिनिधी विजय बनसोड

गंगापूर : यापूर्वी अल्पवयीन मुलीशी संबंधित दोन गुन्हे शिल्लेगाव पोलीस ठाण्यात दाखल असून, पंधरा दिवस न्यायालयीन कोठडीत राहून आल्यानंतरही संबंधित मुलीला त्रास देणे सुरूच असल्याचा आरोप करण्यात आला आहे. संदेश बाबासाहेब पवार (रा. कनकोरी) याच्याविरुद्ध गंगापूर पोलीस ठाण्यात पुन्हा गुन्हा दाखल झाल्याची माहिती समोर आली आहे. त्यामुळे त्याच्याविरुद्ध नोंदविण्यात आलेल्या गुन्ह्यांची संख्या तीन झाली आहे. या घटनेमुळे अल्पवयीन विद्यार्थिनींच्या सुरक्षिततेचा प्रश्न पुन्हा ऐरणीवर आला आहे.

पोलिसांकडे दिलेल्या तक्रारीनुसार, संबंधित १७ वर्षीय विद्यार्थिनी गंगापूर येथील मुक्तानंद महाविद्यालयात बारावी विज्ञान शाखेत शिक्षण घेत आहे. बुधवारी (दि. २१ ऑक्टोबर) ती नेहमीप्रमाणे कनकोरी येथून बसने महाविद्यालयात येत असताना शिवाजी चौक परिसरात संदेश पवार मोटारसायकलवर थांबलेला दिसला. तो आपला पाठलाग करीत असल्याचा संशय आल्याने विद्यार्थिनीने शिवाजी चौकात न उतरता पुढील आंबेडकर चौकात उतरून महाविद्यालयाकडे जाण्याचा निर्णय घेतला.

मात्र, काही अंतर पुढे गेल्यानंतर संदेश पवार मोटारसायकलवरून तिच्याजवळ आला आणि आपल्याला ती आवडत असल्याचे सांगून बोलण्याचा आग्रह केल्याचे तक्रारीत नमूद आहे. विद्यार्थिनी महाविद्यालयात गेल्यानंतरही तो प्रवेशद्वाराजवळ थांबलेला दिसल्याचे तिने पोलिसांना सांगितले.

दुपारी महाविद्यालयातून बाहेर पडताना पुन्हा पाठलाग होण्याची भीती वाटल्याने विद्यार्थिनीने मागील प्रवेशद्वारातून बाहेर पडून गंगापूर बसस्थानक गाठले. मात्र, तेथेही संदेश पवार मोटारसायकलवर थांबलेला दिसल्याने तिने वडिलांना फोन करून घटनेची माहिती दिली. वडील बसस्थानकावर आल्यानंतर त्यांनी मुलीला सोबत घेऊन गंगापूर पोलीस ठाण्यात तक्रार दाखल केली.

आधी दोन गुन्हे, आता तिसऱ्या प्रकरणाची नोंद

तक्रारीनुसार, संदेश पवार याच्याविरुद्ध २०२३ आणि २०२५ मध्ये शिल्लेगाव पोलीस ठाण्यात अल्पवयीन मुलीशी संबंधित, पोक्सो कायद्याचाही समावेश असलेले दोन गुन्हे दाखल आहेत. यापूर्वी तो पंधरा दिवस न्यायालयीन कोठडीत राहून आल्याचेही सांगण्यात आले आहे. त्यानंतर पुन्हा त्याच मुलीचा पाठलाग करून त्रास दिल्याचा आरोप झाल्याने गंगापूर पोलीस ठाण्यात तिसऱ्या गुन्ह्याची नोंद करण्यात आली आहे.

वारंवार अशा प्रकारच्या तक्रारी समोर येत असल्याने संबंधित विद्यार्थिनीच्या सुरक्षिततेचा प्रश्न महत्त्वाचा ठरला आहे. या प्रकरणात पोलिसांकडून पुढील कायदेशीर कारवाई केली जात आहे.