पोहरादेवीत ५ नोव्हेंबरला १,००१ गाय-वासरांचे पूजन व गोदान महोत्सव

१ लाख १ हजार महादिव्यांचा उत्सव; १ लाख २५ हजार समाजबांधवांच्या उपस्थितीचे उद्दिष्ट

लोकार्थ प्रतिनिधी रमाकांत पोले

हिंगोली: बंजारा समाजाची काशी म्हणून ओळखल्या जाणाऱ्या श्रीक्षेत्र पोहरादेवी येथे गुरुवार, ५ नोव्हेंबर २०२६ रोजी वसुबारसच्या शुभमुहूर्तावर भव्य गोदान महोत्सवाचे आयोजन करण्याचा संकल्प अखिल भारतीय बंजारा (लमाणी) शक्तीपीठाच्या वतीने करण्यात आला आहे.
धर्मगुरू संत रामराव महाराज यांचे उत्तराधिकारी धर्मगुरू बाबूसिंग महाराज यांच्या पुढाकारातून आद्यगोरक्षक संत सेवालाल महाराज गोदान संवाद यात्रा, १,००१ गाय-वासरांचे महापूजन, महाआरती, १ लाख १ हजार महादिव्यांचा उत्सव आणि भाऊबीजेनिमित्त १,००१ गाय-वासरांच्या गोदानाचा कार्यक्रम आयोजित करण्याचे नियोजन आहे.
या सोहळ्यास सुमारे १ लाख २५ हजार समाजबांधव उपस्थित राहावेत, असे उद्दिष्ट ठेवण्यात आले आहे. गोमातेचे संवर्धन, बंजारा समाजाची परंपरा आणि भारतीय संस्कृतीतील गोदानाचे महत्त्व जनमानसात रुजविण्याचा या उपक्रमामागील उद्देश आहे.
या कार्यक्रमाला उपस्थित राहून सहकार्य करावे, तसेच विविध क्षेत्रांतील मान्यवर आणि समाजबांधवांना गोदानासाठी प्रेरित करावे, असे आवाहन धर्मगुरू बाबूसिंग महाराज यांनी राज्यसभा खासदार रामराव वडकुते यांना पत्राद्वारे केले आहे.