श्रीलंकेचा ४३० धावांचा महाविक्रमी पाठलाग करत इंग्लंडवर थरारक विजय!

हॅरी ब्रुकचे सर्वात वेगवान ऐतिहासिक द्विशतक वाया;

लोकार्थ प्रतिनिधी शरद मेहकरे

रावलपिंडी: पाकिस्तानमध्ये सुरू असलेल्या एकदिवसीय त्रिकोणी मालिकेत आज क्रिकेट इतिहासातील एक अत्यंत अद्भूत आणि थरारक सामना पाहायला मिळाला. इंग्लंडचा कर्णधार हॅरी ब्रुकने अवघ्या ११४ चेंडूंत वनडे इतिहासातील सर्वात वेगवान द्विशतक झळकावून इतिहास रचला. इंग्लंडने ५० षटकांत ४२९ धावांचा डोंगर उभा केला होता. मात्र, श्रीलंकेच्या फलंदाजांनी अभूतपूर्व फलंदाजीचे प्रदर्शन करत ४३० धावांचे महाकाय आव्हान ४९.५ षटकांत ८ गडी गमावून पूर्ण केले आणि २ गड्यांनी ऐतिहासिक विजय मिळवला.नाणेफेक जिंकून प्रथम गोलंदाजी करण्याचा श्रीलंकेचा निर्णय इंग्लंडच्या फलंदाजांनी पूर्णपणे चुकीचा ठरवला. कर्णधार हॅरी ब्रुकने २०२ धावांची (११६ चेंडू, २१ चौकार, १० षटकार) स्फोटक खेळी केली. त्याला जो रूट (६९ धावा) आणि विल जॅक्स (६६ धावा) यांनी उत्तम साथ दिली.
४३० धावांच्या आव्हानाचा पाठलाग करताना श्रीलंकेची सुरुवात खराब झाली होती, मात्र पवन रथनायकेच्या १३० धावांच्या धडाकेबाज शतकाने सामन्याचे चित्र पालटले. त्यानंतर दासून शनाकाने केवळ ५० चेंडूंत ९७ धावांची वादळी खेळी करत श्रीलंकेला विजयाच्या उंबरठ्यावर आणले. शेवटच्या षटकात अटीतटीच्या क्षणी जनित लियानागेने (६१ धावा) शानदार षटकार खेचत श्रीलंकेच्या ऐतिहासिक विजयावर शिक्कामोर्तब केले. हॅरी ब्रुकला त्याच्या विक्रमी द्विशतकानंतरही पराभवाचा सामना करावा लागला.