कन्नडच्या वनपरिक्षेत्र अधिकाऱ्यास ५ हजारांची लाच स्वीकारताना रंगेहाथ अटक; एसीबीची धडक कारवाई

लोकार्थ प्रतिनिधी कार्तिक राजगुरू

कन्नड – लाकूड खरेदी-विक्रीचा व्यवसाय करणाऱ्या एका व्यापाऱ्याकडून वाहनावर कारवाई न करण्यासाठी तसेच गाडी हद्दपार करून देण्यासाठी मासिक हप्त्यापोटी ५,००० रुपयांची लाच स्वीकारताना कन्नड वनविभाग कार्यालयातील वनपरिक्षेत्र अधिकारी (RFO) शिवाजी नागनाथ टोम्पे (वय ३५, वर्ग २ राजपत्रित अधिकारी) यास लाचलुचपत प्रतिबंधक विभागाने (ACB) रंगेहाथ पकडले आहे. ही धडक कारवाई शुक्रवारी, १६ ऑक्टोबर २०२६ रोजी तहसील कार्यालय, कन्नड परिसरात करण्यात आली.
मिळालेल्या माहितीनुसार, ५४ वर्षीय तक्रारदार यांचा लाकूड खरेदी-विक्री व वाहतुकीचा व्यवसाय आहे. त्यांच्या लाकूड वाहतूक करणाऱ्या गाडीवर कोणतीही कारवाई न करण्यासाठी व गाडी हद्दपार करून देण्यासाठी आरोपी RFO शिवाजी टोम्पे याने सुरुवातीला ७,००० रुपयांच्या मासिक हप्त्याची मागणी केली होती. मात्र, तक्रारदाराची लाच देण्याची इच्छा नसल्याने त्यांनी लाचलुचपत प्रतिबंधक विभाग, छत्रपती संभाजीनगर येथे तक्रार दाखल केली. या तक्रारीच्या आधारे १४ ऑक्टोबर २०२६ रोजी करण्यात आलेल्या लाच मागणीच्या पडताळणीदरम्यान आरोपीने ७,००० रुपयांवरून तडजोड करत ५,००० रुपये लाच स्वीकारण्याचे मान्य केले.
त्यानंतर शुक्रवारी (१६ ऑक्टोबर) तहसील कार्यालय, कन्नड येथे आखलेल्या सापळ्यात तक्रारदाराकडून पंचांसमक्ष ५,००० रुपयांची लाच स्वीकारताना आरोपी टोम्पे याला पथकाने जाळ्यात पकडले. याप्रकरणी कन्नड शहर पोलीस ठाण्यात गुन्हा दाखल करण्याची प्रक्रिया सुरू असून आरोपीला ताब्यात घेण्यात आले आहे. ही कारवाई पोलीस अधीक्षक श्रीमती माधुरी केदार-कांगणे आणि अपर पोलीस अधीक्षक शशीकांत सिंगारे यांच्या मार्गदर्शनाखाली, पोलीस उपअधिक्षक प्रशांत पवार यांच्या पर्यवेक्षणात पोलीस निरीक्षक अमोल सोनवणे, पोलीस निरीक्षक प्रतिभा आबुज व त्यांच्या सहकाऱ्यांच्या पथकाने केली आहे.