दुष्काळाच्या झळा, वाढता खर्च अन् बाजारभावाची अनिश्चितता; मोसंबी उत्पादक संकटात!

दादेगावच्या शेतकऱ्यांचे खासदार संदिपान भुमरे यांना निवेदन

लोकार्थ प्रतिनिधी चंद्रकांत अंबिलवादे

पैठण : दुष्काळी परिस्थिती, पाण्याची वाढती टंचाई, मोसंबी उत्पादनाचा वाढता खर्च आणि बाजारभावातील अनिश्चितता यामुळे मोसंबी उत्पादक शेतकरी आर्थिक संकटात सापडले आहेत. या पार्श्वभूमीवर मोसंबी फळबागांच्या संरक्षणासाठी शासनाने ठोस उपाययोजना करून मोसंबी उत्पादकांना प्रति हेक्टर आर्थिक मदत जाहीर करावी, अशी मागणी दादेगाव येथील मोसंबी चळवळीतील शेतकऱ्यांनी खासदार संदिपान भुमरे यांच्याकडे निवेदनाद्वारे केली.

शासनाने दुष्काळ जाहीर केला असून, या परिस्थितीत मोसंबी उत्पादक शेतकऱ्यांचाही गांभीर्याने विचार करावा, अशी मागणी शेतकऱ्यांनी केली आहे. दुष्काळाच्या काळात मोसंबी फळबागा टिकवणे शेतकऱ्यांसाठी मोठे आव्हान ठरत असल्याने शासनाने मोसंबी उत्पादकांसाठी स्वतंत्र धोरण राबवावे, अशी अपेक्षा व्यक्त करण्यात आली.

प्रत्येक गावातील मोसंबी फळबागा वाचवण्यासाठी शासनाच्या स्तरावर योग्य मार्गदर्शन उपलब्ध करून देण्याबरोबरच शेतकऱ्यांना पीकविम्याचा लाभ मिळावा आणि मोसंबी फळाला हमीभाव जाहीर करावा, अशा विविध मागण्या निवेदनातून करण्यात आल्या.

यावेळी दादेगाव मोसंबी चळवळीचे संस्थापक अध्यक्ष दीपक हजारे, हर्षीचे सरपंच डॉ. गणेश राऊत, ज्ञानदेव हजारे आणि परशराम हजारे यांनी खासदार संदिपान भुमरे यांची भेट घेऊन शेतकऱ्यांच्या अडचणी मांडल्या.