पाण्याअभावी दोन एकर टमाट्याची बाग करपली; अडीच लाखांचा खर्च वाया!

केज तालुक्यातील माळेगाव येथील शेतकरी महादेव घाडगे यांना दुष्काळाचा फटका; तोकडी मदत नको, भरीव आर्थिक मदतीची मागणी

लोकार्थ प्रतिनिधी गौतम बचुटे

आता जसजशी ऑक्टोबर हिट वाढू लागली तसतशा दुष्काळी झळा तीव्र व्हायला सुरुवात झाली आहे. ज्या अपेक्षेने आणि मोठ्या उमेदीने शेतकऱ्यांनी खरीप हंगामात सोयाबीन, उडीद, मूग आणि कपाशी यांची पेरणी व लावणी केली होती त्या पिकांना दोन ते सव्वा दोन महिन्या पेक्षा जास्त पावसाच्या पडलेल्या दीर्घ खंडा मुळे एक तर अल्प मुदतीचे पिके करपून गेली तर सोयाबीन शेंगा दाणे भरण्या पूर्वीच वांझ जन्मले. त्यामुळे शेतकऱ्यांच्या स्वप्नांचा कोळसा झाला.

माळेगाव ता. केज जि. बीड येथील महादेव घाडगे या शेतकऱ्याने त्याच्या शेतात दोन एकर क्षेत्रामध्ये टमाटे लागवड केली होती.
त्यांनी टमाटे लागवड पूर्व मशागतीसाठी नांगरणी, पाळी, बेसल डोस, शेणखत घालून मल्चिंग अंथरूण टमाट्याची लागवड केली. त्या नंतर पीक जोमात असताना त्याला बांबू काट्या तारेच्या साह्याने बांधणी करून घेतली आणि पीक येण्याच्या वेळेलाच पावसाने खंड दिला. त्यामुळे विहिरी आणि बोअरच्या उपलब्ध पाण्यावर पीक जगवली. परंतु साठ ते सत्तर दिवसाच्या दिर्घ खंडा नंतर सुद्धा पाऊस पडला नसल्याने पाणी पातळी खोल गेली. त्यामुळे टमाट्याचे पीक जगविणे त्यांना मुश्किल झाले. ऐन फुला फळांनी बहरत असलेले टमाट्याचे पीक डोळ्या देखत करपून गेली.
महादेव घाडगे यांनी दोन एकर टमाट्याच्या लागवडीसाठी कर्ज घेऊन सुमारे दोन ते अडीच लाख रुपये खर्च केले, परंतु दुष्काळी परिस्थितीत पाण्याअभावी त्यांची पूर्ण बागही फळे येण्याच्या पूर्वीच करपून गेली. त्यामुळे उत्पन्नातून नफा मिळणे तर दूरच राहिले परंतु दोन ते अडीच लाखाचा झालेला खर्च आणि मेहनत देखील वाया गेली आहे.

,तोकडी मदत नको तर भरीव मदत हवी :-
अल्प मुदतीची पिके, दीर्घ मुदतीचे पिके आणि आले भाज्या व फळभाज्या पिकविणाऱ्या शेतकऱ्यांना येणारा खर्च पहाता सरकारने जाहीर केलेली मदत तोकडी असल्याने किमान झालेला झालेला खर्च तरी निघेल अशी भरीव मदत मिळायला हवी.