अशोकभैय्या निलंगेकर यांची कोल्हापूर लोकसभा मतदारसंघाच्या प्रभारीपदी निवड

काँग्रेस पक्षाकडून महत्त्वाची जबाबदारी; समर्थकांकडून अभिनंदनाचा वर्षाव

लोकार्थ प्रतिनिधी शरद मेहकरे लातूर

निलंगा : विधानसभा मतदारसंघातील काँग्रेसचे लोकप्रिय नेते मा. अशोकभैय्या शिवाजीराव पाटील निलंगेकर यांची ४७-कोल्हापूर लोकसभा मतदारसंघाच्या प्रभारीपदी निवड करण्यात आली आहे. काँग्रेस पक्षाने त्यांच्यावर महत्त्वाची जबाबदारी सोपविल्याने निलंगा मतदारसंघातील कार्यकर्त्यांमध्ये उत्साहाचे वातावरण आहे.

काँग्रेसचे राष्ट्रीय अध्यक्ष मा. मल्लिकार्जुन खरगे, लोकसभेतील विरोधी पक्षनेते मा. राहुल गांधी आणि खासदार मा. प्रियंका गांधी यांच्या नेतृत्वाखालील काँग्रेस पक्षाचे विचार आणि पक्षाची ध्येयधोरणे तळागाळातील जनतेपर्यंत पोहोचविण्यासाठी अशोकभैय्या निलंगेकर सातत्याने कार्यरत राहतील, हा विश्वास व्यक्त करत त्यांच्यावर ही जबाबदारी सोपविण्यात आली आहे.

महाराष्ट्र काँग्रेसचे नवनियुक्त प्रभारी मा. डॉ. सिरीवेल्ला प्रसाद राव यांच्या सूचनेनुसार आणि महाराष्ट्र प्रदेश काँग्रेस कमिटीचे अध्यक्ष मा. हर्षवर्धन सपकाळ यांच्या आदेशानुसार ही निवड करण्यात आल्याचे निवेदनात नमूद करण्यात आले आहे.

या निवडीमुळे अशोकभैय्या निलंगेकर यांना कोल्हापूर लोकसभा मतदारसंघात काँग्रेस पक्ष संघटना मजबूत करण्याची, कार्यकर्त्यांमध्ये समन्वय साधण्याची आणि पक्षाचा पुरोगामी विचार जनसामान्यांपर्यंत पोहोचविण्याची महत्त्वपूर्ण संधी मिळणार आहे.

अशोकभैय्या निलंगेकर यांच्या या निवडीबद्दल काँग्रेस कार्यकर्ते, पदाधिकारी आणि समर्थकांकडून त्यांचे अभिनंदन करण्यात येत असून, त्यांच्या पुढील राजकीय वाटचालीस शुभेच्छा दिल्या जात आहेत.