शॉर्टसर्किटमुळे १४ ते १५ शेतकऱ्यांचे मोठे नुकसान; वर्षभराच्या कष्टांवर क्षणात पाणी, बळीराजा हवालदिल
लोकार्थ प्रतिनिधी सुशील गायकवाड पूर्णा
एकीकडे दुष्काळाचे सावट, पाण्याची टंचाई आणि शेतीपिकांची चिंता, तर दुसरीकडे शॉर्टसर्किटमुळे लागलेल्या आगीने शेतकऱ्यांच्या उरल्यासुरल्या आशाही भस्मसात केल्या आहेत. पूर्णा तालुक्यातील आहेरवाडी शिवारात बुधवारी दुपारी तीनच्या सुमारास विजेच्या तारांमधील घर्षणामुळे लागलेल्या भीषण आगीत तब्बल १४ ते १५ शेतकऱ्यांचा सुमारे २५ एकर ऊस जळून खाक झाला. हातातोंडाशी आलेला घास आगीने हिरावून घेतल्याने शेतकऱ्यांवर मोठे आर्थिक संकट कोसळले आहे.
आहेरवाडी शिवारातून गेलेल्या वीजवाहक तारांमध्ये बुधवारी दुपारी तीनच्या सुमारास घर्षण होऊन अचानक ठिणग्या पडल्या. या ठिणग्यांमुळे उसाच्या पिकाने पेट घेतला. परिसरात वारा असल्याने आगीने काही क्षणांतच रौद्र रूप धारण केले. पाहता पाहता आगीचा लोळ उसाच्या शेतांमध्ये पसरला. आग लागल्याचे समजताच ग्रामस्थ आणि शेतकऱ्यांनी घटनास्थळी धाव घेत पाण्याचा मारा करून आग आटोक्यात आणण्याचा प्रयत्न केला. मात्र, आगीची तीव्रता इतकी होती की, तब्बल २५ एकरांतील ऊस जळून खाक झाला.
या दुर्घटनेत गट क्रमांक ३४७ मधील प्रथमेश प्रशांत मोरे, गट क्रमांक ३२६ मधील विनायक आबासाहेब मोरे, गट क्रमांक २५४ मधील सारजाबाई मच्छिंद्र मोरे, माधव रामकिशन मोरे, बालाजी मुंजाजी मोरे, कान्होपात्रा मारुतराव मोरे, गवनाजी रंगनाथराव मोरे, रामचंद्र गंगाराम मोरे, योगेश बळीराम मोरे, तसेच गट क्रमांक २५५ मधील राम कुंडलिक मोरे, बबन मुंजाजी मोरे, माधव मुंजाजी मोरे आणि केरबा कुंडलिक मोरे यांच्यासह १४ ते १५ शेतकऱ्यांचे नुकसान झाले आहे.
आधीच दुष्काळी परिस्थितीमुळे शेतीचा खर्च भागवताना शेतकऱ्यांची दमछाक होत आहे. त्यातच वर्षभर पाणी, खते आणि मशागतीवर खर्च करून जोपासलेले ऊसपीक डोळ्यांदेखत जळून खाक झाल्याने शेतकऱ्यांचे मोठे नुकसान झाले आहे. ऊस तोडणीच्या प्रतीक्षेत असताना आलेल्या या संकटामुळे शेतकऱ्यांच्या आर्थिक नियोजनालाच मोठा धक्का बसला आहे. विशेष म्हणजे गतवर्षी झालेल्या नुकसानीची भरपाई अद्याप प्रलंबित असतानाच पुन्हा जळीत दुर्घटना घडल्याने आहेरवाडीतील शेतकऱ्यांमध्ये संताप आणि चिंतेचे वातावरण आहे.
पंचनामे करून तातडीने नुकसानभरपाई द्या!
महसूल आणि कृषी विभागाने तातडीने घटनास्थळी भेट देऊन जळालेल्या ऊस क्षेत्राचे वस्तुनिष्ठ पंचनामे करावेत आणि बाधित शेतकऱ्यांना तातडीने नुकसानभरपाई मिळवून द्यावी, अशी मागणी होत आहे. तसेच महावितरण विभागाने शॉर्टसर्किटचे नेमके कारण शोधून परिसरातील जीर्ण वीजवाहक तारा आणि धोकादायक विद्युत यंत्रणेची तातडीने दुरुस्ती करावी. शेतकऱ्यांच्या पिकांचे संरक्षण करण्यासाठी विद्युत यंत्रणेची नियमित देखभाल करणे आवश्यक असताना अशा दुर्घटना घडत असल्याने महावितरणच्या कारभारावरही प्रश्नचिन्ह उपस्थित होत आहे.
दुष्काळाच्या संकटाशी झुंज देणाऱ्या बळीराजाला आता जळीत दुर्घटनेचा दुहेरी फटका बसला आहे. शासनाने केवळ पंचनाम्यांचे सोपस्कार न करता बाधित शेतकऱ्यांना प्रत्यक्ष मदत देऊन दिलासा द्यावा, अशी आर्त मागणी परिसरातील शेतकऱ्यांकडून होत आहे.
लोकार्थ न्यूज तालुका प्रतिनिधी सुशिल एसगायकवाड पूर्ण परभणी
No Comment! Be the first one.