उपमुख्यमंत्री सुनेत्रा पवार यांनी दिला हिंगोली जिल्ह्याच्या दुष्काळग्रस्त जनतेला दिला सर्वतोपरी मदतीचा शब्द!
लोकार्थ प्रतिनिधी गोपाल सातपुते
हिंगोली जिल्ह्यात निर्माण झालेल्या दुष्काळी परिस्थितीमुळे शेतकरी, शेतमजूर आणि सर्वसामान्य नागरिक मोठ्या आर्थिक संकटाला सामोरे जात आहेत. या पार्श्वभूमीवर राष्ट्रवादी काँग्रेस पक्षाचे माजी जिल्हाध्यक्ष बी. डी. बांगर यांनी मुंबई येथे राज्याच्या उपमुख्यमंत्री सुनेत्राताई अजितदादा पवार यांची भेट घेऊन हिंगोली जिल्ह्यातील दुष्काळी परिस्थितीबाबत सविस्तर निवेदन सादर केले.
या भेटीदरम्यान हिंगोली जिल्ह्यातील दुष्काळग्रस्त शेतकऱ्यांना आर्थिक मदत, शेतमजुरांना दिलासा तसेच सर्वसामान्य नागरिकांच्या अडचणी दूर करण्यासाठी शासनाने तातडीने आवश्यक उपाययोजना कराव्यात, अशी आग्रही मागणी बी. डी. बांगर यांनी केली. दुष्काळामुळे शेतीचे झालेले नुकसान, शेतकऱ्यांची आर्थिक परिस्थिती आणि ग्रामीण भागातील जनतेसमोर निर्माण झालेल्या समस्यांबाबत त्यांनी उपमुख्यमंत्र्यांशी सविस्तर चर्चा केली.
हिंगोली जिल्ह्यातील दुष्काळी परिस्थितीची गांभीर्याने दखल घेत उपमुख्यमंत्री सुनेत्राताई पवार यांनी जिल्ह्यातील दुष्काळग्रस्त जनतेला शासनाच्या माध्यमातून सर्वतोपरी मदत करण्याबाबत सकारात्मक आश्वासन दिल्याची माहिती बी. डी. बांगर यांनी दिली.
दुष्काळाच्या कठीण काळात शेतकरी बांधवांना आधार देणे ही आपली सामाजिक आणि राजकीय जबाबदारी आहे. हिंगोली जिल्ह्यातील शेतकरी, शेतमजूर आणि सर्वसामान्य नागरिकांना न्याय मिळवून देण्यासाठी आपण सातत्याने पाठपुरावा करणार असल्याचेही बी. डी. बांगर यांनी स्पष्ट केले.
No Comment! Be the first one.