इंग्रजी माध्यमाच्या शाळांनी फी थकबाकीमुळे विद्यार्थ्यांचे निकाल रोखू नयेत

मराठी शाळांचा दर्जा सुधारण्याची मागणी
लोकार्थ प्रतिनिधी राहुल मुळे जालना
इंग्रजी माध्यमाच्या शाळांमध्ये फी थकबाकी असल्याच्या कारणावरून विद्यार्थ्यांचा निकाल किंवा प्रगतीपुस्तक रोखण्यात येऊ नये, तसेच मराठी माध्यमाच्या शाळांचा शैक्षणिक दर्जा सुधारण्यासाठी शासनाने विशेष योजना राबवावी, अशी मागणी मुख्यमंत्री यांच्याकडे निवेदनाद्वारे करण्यात आली आहे.
या निवेदनात म्हटले आहे की, राज्यातील मराठी माध्यमाच्या शाळांचा शैक्षणिक दर्जा सुधारण्याची गरज असून, अनेक सर्वसामान्य पालक आपल्या मुलांच्या उज्ज्वल भविष्यासाठी इंग्रजी माध्यमाच्या शाळांना प्राधान्य देतात. मात्र, या शाळांची वाढती फी भरणे आर्थिकदृष्ट्या दुर्बल आणि सर्वसामान्य कुटुंबांना कठीण जात आहे.
काही वेळा पालकांना आर्थिक अडचणींमुळे फी भरण्यास विलंब होतो. अशा वेळी विद्यार्थ्यांचा निकाल किंवा प्रगतीपुस्तक रोखणे योग्य नाही. विद्यार्थ्याने वर्षभरात केलेली शैक्षणिक प्रगती समजणे हा पालकांचा महत्त्वाचा अधिकार आहे. त्यामुळे फी वसुलीसाठी शाळांनी योग्य कायदेशीर मार्गाचा अवलंब करावा; मात्र त्याचा परिणाम विद्यार्थ्यांच्या शिक्षणावर होऊ नये, असे निवेदनात नमूद करण्यात आले आहे.
निवेदनातील प्रमुख मागण्या

1. फी थकबाकीच्या कारणावरून विद्यार्थ्यांचा निकाल किंवा प्रगतीपुस्तक रोखण्यास प्रतिबंध करण्याबाबत स्पष्ट निर्देश द्यावेत.
2. फी वसुलीसाठी विद्यार्थ्यांच्या शैक्षणिक प्रगतीला बाधा न आणता योग्य कायदेशीर प्रक्रिया राबवावी.
3. मराठी माध्यमाच्या शाळांचा शैक्षणिक दर्जा सुधारण्यासाठी विशेष योजना राबवून पालकांचा विश्वास वाढवावा.