खड्डे आणि धुळीने घेतला आणखी एक बळी! ऊस वाहतूक करणाऱ्या वाहनाच्या धडकेत २५ वर्षीय तरुणाचा जागीच मृत्यू

गंगापूर–कायगाव रस्ता बनला मृत्यूचा सापळा; बांधकाम विभागाच्या कारभारावर प्रश्नचिन्ह, आणखी किती बळी गेल्यावर रस्त्याचे काम होणार?

लोकार्थ प्रतिनिधी विजय बनसोड गंगापूर

गंगापूर ते जुने कायगाव राज्यमार्गावरील खड्डे आणि धुळीच्या साम्राज्यामुळे वाहनधारकांचा जीव धोक्यात आला असतानाच शनिवारी रात्री आणखी एका भीषण अपघाताने परिसर हादरला. टी-पॉइंटजवळ ऊस वाहतूक करणाऱ्या अज्ञात वाहनाने दुचाकीला जोरदार धडक दिली. या भीषण अपघातात दुचाकीस्वार सुरेश दत्तात्रय जऱ्हाड (वय २५, रा. माळेवाडी, ता. नेवासा) यांचा जागीच मृत्यू झाला. या घटनेमुळे गंगापूर–कायगाव रस्त्यावरील अपघातांचा प्रश्न पुन्हा ऐरणीवर आला असून, आणखी किती निष्पापांचे बळी गेल्यानंतर प्रशासनाला जाग येणार? असा संतप्त सवाल वाहनधारकांकडून उपस्थित केला जात आहे.

शनिवारी (ता. १७) रात्री आठ वाजेच्या सुमारास हा अपघात घडला. सुरेश जऱ्हाड हे दुचाकी (एमएच १२ केके ६२९६) वरून गंगापूरहून आपल्या माळेवाडी गावाकडे जात होते. यावेळी गंगापूरच्या दिशेने जाणाऱ्या ऊस वाहतूक करणाऱ्या अज्ञात वाहनाने रस्त्यावरील खड्डे चुकवताना त्यांच्या दुचाकीला धडक दिल्याची प्राथमिक माहिती आहे. धडक इतकी भीषण होती की, वाहनाचे चाक त्यांच्या डोक्यावरून गेल्याने त्यांना गंभीर दुखापत झाली. मोठ्या प्रमाणात रक्तस्राव झाल्याने त्यांचा घटनास्थळीच मृत्यू झाला.

अपघाताची माहिती मिळताच पोलीस अंमलदार पदमकुमार जाधव,होमगार्ड गोरख यादव, बबलू लगड, सुनील साध्दे, किरण रासने व वायसाळ हे घटनास्थळी दाखल झाले. मृतदेह शवविच्छेदनासाठी गंगापूर उपजिल्हा रुग्णालयात पाठविण्यात आला. रात्री उशिरापर्यंत या प्रकरणी गुन्हा दाखल करण्याची प्रक्रिया सुरू होती. अपघातानंतर संबंधित वाहनचालकाची ओळख पटविण्याचे आणि घटनेची माहिती तपासण्याचे आव्हान पोलिसांसमोर आहे.

खड्डे बुजवले की धुळीचे संकट वाढवले?

गंगापूर ते जुने कायगाव या मार्गावर यापूर्वीही अनेक अपघात घडले असून, अनेकांना आपला जीव गमवावा लागला आहे. रस्त्यावरील मोठमोठे खड्डे बुजविण्यासाठी बांधकाम विभागाकडून मुरूम आणि माती टाकण्यात आल्याने आता या मार्गावर धुळीचे साम्राज्य निर्माण झाले आहे. वाहनांची ये-जा सुरू असताना मोठ्या प्रमाणात धूळ उडत असल्याने समोरून येणारे वाहन स्पष्टपणे दिसत नसल्याची तक्रार वाहनधारकांकडून केली जात आहे. त्यातच खड्डे चुकविण्याच्या प्रयत्नात वाहनांचा ताबा सुटण्याची शक्यता वाढत असून, अपघातांचा धोका अधिक गंभीर बनला आहे.

प्रशासन आणखी किती बळींची वाट पाहणार?

या रस्त्यावरील खड्डे, धूळ आणि अपघातांचा प्रश्न वारंवार समोर येत असतानाही कायमस्वरूपी उपाययोजना कधी होणार, असा प्रश्न नागरिक उपस्थित करीत आहेत. रस्त्यावर तातडीने पाणी मारून धूळ उडणार नाही, याची व्यवस्था करावी, तसेच रखडलेले रस्त्याचे काम लवकरात लवकर पूर्ण करावे, अशी मागणी वाहनधारकांकडून होत आहे.

एका तरुणाचा जीव गेला, एका कुटुंबाचा आधार हरपला; मात्र या रस्त्याची दुरवस्था कधी संपणार? खड्डे, धूळ आणि अपघातांच्या या दुष्टचक्रातून वाहनधारकांची सुटका करण्यासाठी बांधकाम विभाग आणि संबंधित प्रशासनाने आता तरी तातडीने पावले उचलावीत, अशी अपेक्षा व्यक्त होत आहे.