दुर्गा देवीच्या विसर्जनादरम्यान मोतीबाग जलकुंडावर तणाव; क्रेनच्या काचा फोडल्या

महापालिका अधिकाऱ्याने अर्धा तास विसर्जनाचे काम थांबवले; पोलिसांची घटनास्थळी धाव, चौकशीनंतर गुन्हा दाखल करणार

लोकार्थ प्रतिनिधी राहुल मुळे जालना

जालना शहरातील मोतीबाग जलकुंडावर दुर्गा देवीच्या मूर्तींचे विसर्जन सुरू असताना क्रेनच्या काचा फोडण्यात आल्याची घटना घडली. या घटनेमुळे परिसरात काही काळ तणावाचे वातावरण निर्माण झाले होते. परिस्थिती लक्षात घेऊन जालना महानगरपालिकेच्या संबंधित अधिकाऱ्याने विसर्जनाचे काम सुमारे अर्धा तास थांबवले. घटनेची माहिती मिळताच पोलिस अधिकाऱ्यांनी घटनास्थळी धाव घेत परिस्थिती नियंत्रणात आणली.
नवरात्रोत्सवानिमित्त जालना शहरातील विविध भागांत दुर्गा मातेच्या मूर्तींची स्थापना करण्यात आली होती. नऊ दिवसांच्या उत्सवानंतर मंगळवारी, २० ऑक्टोबर रोजी शहरातील वैभवात भर घालणाऱ्या मोतीबाग जलकुंडावर मूर्ती विसर्जनासाठी भाविकांची गर्दी झाली होती. प्रशासनाच्या व्यवस्थेनुसार विसर्जनाची प्रक्रिया सुरू असताना क्रेनच्या काचा फोडण्यात आल्याची घटना घडली. या प्रकारानंतर विसर्जनस्थळी काही काळ तणाव निर्माण झाला.
घटनेची माहिती मिळताच अपर पोलिस अधीक्षक विक्रांत साळी, उपविभागीय पोलिस अधिकारी आनंद कुलकर्णी आणि चंदनझिरा पोलिस ठाण्याचे पोलिस निरीक्षक किरण बिडवे यांच्यासह पोलिस अधिकारी व कर्मचाऱ्यांनी घटनास्थळी धाव घेतली. पोलिसांनी परिस्थिती हाताळत वातावरण शांत करण्यासाठी प्रयत्न केले.
दरम्यान, या घटनेमुळे विसर्जनाच्या कामात काही काळ व्यत्यय निर्माण झाला. महापालिकेच्या संबंधित अधिकाऱ्याने सुरक्षेच्या दृष्टीने सुमारे अर्धा तास काम थांबविल्याची माहिती आहे. त्यानंतर परिस्थितीचा आढावा घेऊन पुढील कार्यवाही करण्यात आली.
चौकशीनंतर संबंधित युवकांवर गुन्हा दाखल करणार
या घटनेबाबत अपर पोलिस अधीक्षक विक्रांत साळी यांनी माहिती देताना सांगितले की, घटनेची चौकशी करण्यात येईल. चौकशीत दोषी आढळणाऱ्या युवकांविरुद्ध गुन्हा दाखल करण्यात येईल, असे त्यांनी स्पष्ट केले.
मोतीबाग जलकुंडावर विसर्जनासाठी मोठ्या संख्येने भाविक उपस्थित असताना घडलेल्या या प्रकारामुळे काही काळ तणावाचे वातावरण निर्माण झाले होते. पोलिसांनी वेळीच हस्तक्षेप केल्याने परिस्थिती शांत करण्यात आली.