परभणीत विश्व हिंदू परिषदेच्या वतीने आज सामूहिक प्रार्थना व शस्त्रपूजन

45 वर्षांची परंपरा

लोकार्थ प्रतिनिधी प्रवीण देशपांडे

विश्व हिंदू परिषदेच्या वतीने मागील ४५ वर्षांपासून परंपरेनुसार सामूहिक प्रार्थना व विजयादशी दसऱ्यानिमित्त शस्त्रपूजन कार्यक्रमाचे आयोजन करण्यात येते. या वर्षीही मंगळवार, दि. २० ऑक्टोबर रोजी स्टेडियम वर सायंकाळी सहा वाजता हा कार्यक्रम होणार आहे.
सामूहिक प्रार्थना, शस्त्रपूजन आणि धार्मिक आशीर्वचनांच्या माध्यमातून समाजात धार्मिक परंपरांबद्दल जागरूकता निर्माण करणे, सामाजिक एकात्मता दृढ करणे आणि सांस्कृतिक मूल्यांचे जतन करणे हा या आयोजनामागील उद्देश आहे.

या कार्यक्रमाला धार्मिक क्षेत्रातील मान्यवरांची उपस्थिती लाभणार आहे. यामध्ये हरिभक्त परायण वेदशास्त्रसंपन्न बाळू गुरु असोलेकर, हरिभक्त परायण भागवताचार्य माधवराव आजेगावकर आणि हरिभक्त परायण श्री रेंगे महाराज हे उपस्थित राहून उपस्थितांना आशीर्वाद देणार आहेत.
या कार्यक्रमाला विश्व हिंदू परिषदेचे महाराष्ट्र क्षेत्र सहमंत्री अनंत पांडे यांची प्रमुख उपस्थिती राहणार आहे. त्यांच्या उपस्थितीत सामूहिक प्रार्थना व शस्त्रपूजनाचा कार्यक्रम पार पडणार आहे.

हिंदू बांधवांनी मोठ्या संख्येने सहभागी व्हावे, असे आवाहन विश्व हिंदू परिषदेच्या वतीने
जिल्हा मंत्री राजकुमार भामरे, सहमंत्री मनोज काबरा, सुनील रामपूरकर, शिवप्रसाद कोरे, सुरेंद्र शहाणे आणि गोपाळ रोडे यांनी केले आहे.

छायाचित्र राहुल धबाले