बुलढाण्यातून येणारा गुटख्याचा साठा पकडला; १५ लाखांचा मुद्देमाल जप्त

ग्रामीण पोलिसांची कारवाई; क्रेटा कारसह गुटखा जप्त, एकाला अटक

लोकार्थ प्रतिनिधी विजय देऊळगावकर

छत्रपती संभाजीनगर : महाराष्ट्रात असलेला पानमसाला आणि सुगंधित तंबाखूची अवैध वाहतूक करणाऱ्या टोळीचा स्थानिक गुन्हे शाखेने पर्दाफाश केला. अजिंठा पोलीस ठाण्याच्या हद्दीतील शिवना येथे सापळा रचून पोलिसांनी गुटख्यासह क्रेटा कार असा एकूण १५ लाख १९ हजार २०० रुपयांचा मुद्देमाल जप्त केला. या प्रकरणी सादिक कडू पठाण (वय ३३, रा. तुर्काबाद खराडी, ता. गंगापूर) याला ताब्यात घेण्यात आले आहे.

स्थानिक गुन्हे शाखेचे पथक अवैध गुटखा वाहतुकीवर लक्ष ठेवून असताना, बुलढाणा जिल्ह्यातून पांढऱ्या रंगाच्या क्रेटा कारमधून गुटखा शिवना मार्गे अजिंठा आणि सिल्लोडकडे विक्रीसाठी आणला जात असल्याची गुप्त माहिती मिळाली. त्यानुसार पोलिसांनी शिवना येथे सापळा रचून एमएच २० जीव्ही ९४०८ क्रमांकाची कार अडवली.

वाहनाची तपासणी केली असता गोण्यांमध्ये महाराष्ट्र शासनाने केलेला पानमसाला आणि सुगंधित तंबाखू आढळून आला. पोलिसांनी ५ लाख १९ हजार २०० रुपयांचा गुटखा आणि अंदाजे १० लाख रुपये किमतीची कार जप्त केली. या अवैध वाहतुकीत सादिक पठाण याच्यासोबत मध्य प्रदेशातील बुरहानपूर येथील धीरज मालवाणी याचाही सहभाग असल्याचे पोलिसांनी नमूद केले आहे.

जप्त मुद्देमालासह सादिक पठाण याला अजिंठा पोलीस ठाण्यात हजर करण्यात आले असून, पुढील तपास सुरू आहे.