मेडिकलमध्ये घुसून तरुणाची चाकूने भोसकून हत्या; हर्सूल परिसरात खळबळ

विजय देऊळगावकर

छत्रपती संभाजीनगर : हर्सूल येथील करीमनगर भागातील लाईफ लाईन मेडिकलमध्ये घुसून टोळक्याने २२ वर्षीय मेडिकलचालक तरुणाची चाकूने भोसकून हत्या केली. ही थरारक घटना शुक्रवारी दुपारी १२ वाजण्याच्या सुमारास घडली. या घटनेमुळे हर्सूल परिसरात भीतीचे वातावरण निर्माण झाले आहे.

शेख फैजल अब्दुल कादर (२२, रा. शरीफ कॉलनी, किराडपुरा) असे मृत तरुणाचे नाव आहे. त्याने डी-फार्मसीचे शिक्षण पूर्ण केल्यानंतर दोन वर्षांपूर्वी करीमनगर येथे स्वतःचे मेडिकल सुरू केले होते. शुक्रवारी दुपारी फैजल नेहमीप्रमाणे मेडिकलमध्ये बसला असताना अचानक काही तरुण तेथे आले. त्यांनी फैजलसोबत वाद घालत मारहाण करण्यास सुरुवात केली.

वाद वाढल्यानंतर टोळक्यातील एकाने धारदार चाकू काढून फैजलच्या पोटात वार केले. गंभीर जखमी झालेला फैजल रक्ताच्या थारोळ्यात कोसळला. घटनेनंतर मारेकरी पसार झाले. नागरिक व नातेवाईकांनी फैजलला तातडीने घाटी रुग्णालयात दाखल केले; मात्र डॉक्टरांनी तपासून त्याला मृत घोषित केले.

या प्रकरणी हर्सूल पोलिसांनी तपास सुरू केला असून, हल्लेखोरांचा शोध घेतला जात आहे.

मृत -शेख फैजल अब्दुल कादर