शेतकऱ्याच्या लेकीची भरारी; वैशाली पवारची नाशिक कारागृह पोलीस दलात निवड

अपयशाने खचली नाही, चार वर्षे शिक्षणापासून दूर राहूनही ध्येय सोडले नाही; नेवरगावात ढोल-ताशांच्या गजरात जंगी स्वागत

लोकार्थ प्रतिनिधी विजय बनसोड गंगापूर

परिस्थिती कितीही प्रतिकूल असली तरी जिद्द, मेहनत आणि ध्येयाची साथ असेल तर यश निश्चित मिळते, याचा प्रत्यय गंगापूर तालुक्यातील नेवरगाव येथील वैशाली मधुकर पवार हिने दिला आहे. शेतकरी कुटुंबातील वैशालीची नुकतीच नाशिक जिल्हा कारागृह विभागातील पोलीस पदावर निवड झाली. तिच्या या यशाने नेवरगावसह पंचक्रोशीत आनंदाचे वातावरण निर्माण झाले असून, ग्रामस्थांनी ढोल-ताशांच्या गजरात भव्य मिरवणूक काढत तिचे जंगी स्वागत केले.

वैशालीचे वडील मधुकर पवार यांची आर्थिक परिस्थिती अत्यंत हलाखीची. जेमतेम शेती आणि वेळप्रसंगी दुसऱ्याच्या शेतात मोलमजुरी करून त्यांनी आपल्या मुलांच्या शिक्षणासाठी प्रयत्न केले. घरची परिस्थिती प्रतिकूल असतानाही वैशालीने लहानपणापासूनच ‘आपण पोलीस अधिकारी व्हायचे’ हे ध्येय डोळ्यासमोर ठेवले.

तिने प्राथमिक शिक्षण जिल्हा परिषद शाळा, नेवरगाव येथे घेतले, तर माध्यमिक शिक्षण वाहेगाव येथील सेंट मेरी संस्थेत झाले. दरम्यान, आई अचानक आजारी पडल्याने वैशालीला तब्बल चार वर्षे महाविद्यालयीन शिक्षणापासून दूर राहावे लागले. आईची प्रकृती सुधारल्यानंतर तिने पुन्हा शिक्षणाला सुरुवात केली. बी.एस्सी.चे शिक्षण घेत असतानाच पोलीस प्रशिक्षण अकादमीत प्रवेश घेऊन तिने पोलीस भरतीची तयारी सुरू केली.

यशाच्या या प्रवासात वैशालीला अनेक अडथळ्यांचा सामना करावा लागला. वनरक्षक पदाची परीक्षा दिली असता अवघ्या तीन गुणांनी तिची संधी हुकली. त्यानंतर मुंबई व पुणे येथे पोलीस पदासाठी प्रयत्न केले; मात्र तेथेही अपयश आले. परंतु या अपयशांनी ती खचली नाही. ‘अपयश म्हणजे शेवट नव्हे, तर यशासाठीची नवी सुरुवात’ या जिद्दीने तिने पुन्हा तयारी केली आणि अखेर नाशिक जिल्हा कारागृह विभागातील पोलीस पदावर निवड मिळवत आपल्या स्वप्नाला गवसणी घातली.

वैशालीच्या यशाची बातमी गावात पोहोचताच ग्रामस्थांनी आनंदोत्सव साजरा केला. ग्रामपंचायत व ग्रामस्थांच्या वतीने ४ ऑक्टोबर रोजी वैशालीसह तिच्या आई-वडिलांचा भव्य नागरी सत्कार करण्यात आला. संगीत वाद्यांच्या गजरात वैशालीची भव्य मिरवणूक काढण्यात आली. शेतकरी कुटुंबातील मुलीने प्रतिकूल परिस्थितीवर मात करून मिळविलेल्या या यशाचे सर्वत्र कौतुक होत आहे.

या सत्कार सोहळ्यास ह.भ.प. रामलखन महाराज, गणेश महाराज शिंदे, ह.भ.प. दौलत मनाळ, ह.भ.प. नामदेव शिंदे, आमदार रमेश बोरणारे, जिल्हाप्रमुख बाबासाहेब जगताप, वाल्मिक शिरसाठ, माजी जिल्हा परिषद सदस्य मधुकर वालतुरे, पंचायत समिती उपसभापती राजेश्वर हिवाळे, पंचायत समिती सदस्या कांताताई गायकवाड, डॉ. बाबासाहेब भाकरे, बाबुराव नरवडे, संतोष गायके, नारायण वालतुरे, नागेश चौधरी, ज्ञानेश्वर नरोडे, सतीश हिवाळे, प्रकाश नरोडे, बाळासाहेब गायकवाड यांच्यासह मोठ्या संख्येने ग्रामस्थ उपस्थित होते.

शेतकरी कुटुंबातील मुलीची ही संघर्षमय यशोगाथा नेवरगावातील तरुणाईसाठी प्रेरणादायी ठरली आहे.