जालन्याच्या पाणीप्रश्नासाठी भाजप प्रदेशाध्यक्षांची भेट

उपमहापौर राजेश राऊत यांनी मुंबईत रवींद्र चव्हाण यांची घेतली सदिच्छा भेट; संभाव्य पाणीटंचाई व दुष्काळी परिस्थितीवर चर्चा.

लोकार्थ प्रतिनिधी राहुल मुळे

जालना : राज्यातील दुष्काळी परिस्थिती आणि जालना शहरावर ओढवू शकणाऱ्या संभाव्य पाणीटंचाईच्या पार्श्वभूमीवर जालना महानगरपालिकेचे उपमहापौर राजेश राऊत यांनी मुंबई येथे भारतीय जनता पार्टीचे महाराष्ट्र प्रदेशाध्यक्ष तथा आमदार रवींद्रदादा चव्हाण यांची सदिच्छा भेट घेतली. मुंबई येथील भाजपच्या प्रदेश कार्यालयात झालेल्या या भेटीदरम्यान जालना शहरातील पाणीपुरवठ्याचा प्रश्न आणि नागरिकांना भेडसावणाऱ्या संभाव्य अडचणींबाबत सविस्तर चर्चा करण्यात आली.
जालना जिल्ह्यातील दुष्काळी परिस्थितीचा शहराच्या पाणीपुरवठ्यावर होणारा संभाव्य परिणाम लक्षात घेता, नागरिकांना पिण्याचे पाणी उपलब्ध करून देण्यासाठी आवश्यक उपाययोजना करण्याची गरज यावेळी अधोरेखित करण्यात आली. शहरातील पाणीपुरवठा सुरळीत राहावा तसेच भविष्यात पाणीटंचाई निर्माण झाल्यास नागरिकांना त्याचा अधिक त्रास सहन करावा लागू नये, यासाठी संबंधित प्रश्नांकडे लक्ष वेधण्यात आले.
या भेटीप्रसंगी उपमहापौर राजेश राऊत यांच्यासमवेत संजय देठे पाटील आणि संदीप गायकवाड पाटील उपस्थित होते.
जालना शहरातील पाणीटंचाईचा प्रश्न ऐरणीवर
दुष्काळी परिस्थितीत पिण्याच्या पाण्याचे नियोजन करणे हे महानगरपालिकेसमोरील महत्त्वाचे आव्हान ठरू शकते. त्यामुळे संभाव्य पाणीटंचाई लक्षात घेऊन पाणीसाठ्याचे नियोजन, नियमित पाणीपुरवठा आणि नागरिकांना दिलासा देण्यासाठी आवश्यक उपाययोजना करण्यावर भर देण्याची गरज आहे.
या भेटीमुळे जालना शहरातील पाणीपुरवठ्याचा प्रश्न वरिष्ठ पातळीवर मांडण्यात आला असून, नागरिकांना दिलासा मिळण्यासाठी पुढील काळात कोणत्या उपाययोजना केल्या जातात, याकडे शहरवासीयांचे लक्ष लागले आहे.