चिमुकल्यांनी हातात घेतली जलसंवर्धनाची मशाल; घोषणांतून दिला पाणी बचतीचा धडा!

भोजराजनगर जिल्हा परिषद शाळेच्या जलसाक्षरता दिंडीतून नागरिकांचे प्रबोधन; पाण्याचा प्रत्येक थेंब जपण्याचे विद्यार्थ्यांचे आवाहन

लोकार्थ प्रतिनिधी शरद मेहकरे लातूर

पाण्याचे महत्त्व सांगण्यासाठी मोठमोठ्या भाषणांची गरज नसते, तर कधी चिमुकल्यांच्या मुखातून निघालेली एखादी घोषणा समाजाला विचार करायला भाग पाडते. असाच काहीसा अनुभव शिरूर अनंतपाळ येथील जिल्हा परिषद प्राथमिक शाळा भोजराजनगरच्या जलसाक्षरता दिंडीदरम्यान पाहायला मिळाला. विद्यार्थ्यांनी घोषणांच्या माध्यमातून पाणी बचतीचा संदेश देत नागरिकांचे लक्ष जलसंवर्धनाकडे वेधले.

सध्याच्या बदलत्या परिस्थितीत पाण्याची उपलब्धता आणि त्याचा काटकसरीने वापर हा प्रत्येक कुटुंबासाठी महत्त्वाचा विषय बनला आहे. पाण्याचा अपव्यय टाळणे, नळाचा अनावश्यक वापर बंद करणे, पावसाचे पाणी साठवणे आणि जलस्रोतांचे जतन करणे, या बाबी केवळ प्रशासनाची जबाबदारी नसून प्रत्येक नागरिकाचे कर्तव्य आहे. हाच विचार विद्यार्थ्यांनी आपल्या कृतीतून मांडला.

जलसाक्षरता दिंडीच्या माध्यमातून विद्यार्थ्यांनी समाजाला एक महत्त्वाचा संदेश दिला. आजची छोटीशी बचत उद्याच्या मोठ्या संकटावर मात करण्यास मदत करू शकते. त्यामुळे पाणीटंचाई निर्माण झाल्यानंतर जागे होण्यापेक्षा आतापासूनच पाणी जपण्याची सवय प्रत्येकाने अंगीकारावी, हा या उपक्रमाचा मुख्य उद्देश होता.

यावेळी मुख्याध्यापक परमेश्वर तोंडारे यांनी विद्यार्थ्यांना मार्गदर्शन करताना जलसंवर्धनाची सुरुवात घरापासून करण्याचे आवाहन केले. शिक्षक देविदास सांगवे यांनी पाणीटंचाईची सद्यस्थिती लक्षात घेता पाणी बचत ही काळाची गरज असल्याचे स्पष्ट केले.

या उपक्रमास शाळा व्यवस्थापन समितीच्या अध्यक्षा सुजाता बरबटले, उपाध्यक्ष संदिप धुमाळे, सदस्य पांडुरंग म्हेत्रे, दयानंद सुगावे, सदस्या दीपाली कांबळे यांच्यासह शाळेतील सर्व शिक्षक-शिक्षिका आणि विद्यार्थी उपस्थित होते. कार्यक्रमाचे आभार प्रदर्शन शिक्षक महादेव सूर्यवंशी यांनी केले.

विशेष म्हणजे, पाणी बचतीचा धडा पुस्तकात शिकण्याबरोबरच तो प्रत्यक्ष समाजापर्यंत पोहोचविण्याचे काम या चिमुकल्यांनी केले. उद्याच्या पिढीला पाण्याचे संकट भोगावे लागू नये, यासाठी आजच्या पिढीने पाणी जपले पाहिजे, हाच या दिंडीचा खरा संदेश ठरला.