जिंतूर आगाराच्या ताफ्यात पाच नवीन ‘जिजाऊ’ गाड्या दाखल; बंद फेऱ्या पुन्हा सुरू!

किनगाव-लातूरसह डिग्रस-परभणी, सायखेडा-परभणी, गडदगव्हाण-वझर-कवडा आणि रिसोड-बामणी-कोठा मार्गावरील प्रवाशांना मोठा दिलासा

लोकार्थ प्रतिनिधी गुणीरत्न वाकोडे

जिंतूर : जिंतूर तालुक्यातील प्रवाशांसाठी दिलासादायक बातमी आहे. जिंतूर आगाराच्या ताफ्यात पाच नवीन ‘जिजाऊ’ बसगाड्या दाखल झाल्याने गाड्यांअभावी विस्कळीत झालेले वेळापत्रक आता पूर्ववत होत आहे. त्यामुळे ग्रामीण भागातील प्रवाशांची होणारी दमछाक थांबणार असून, बंद करण्यात आलेल्या काही आवश्यक फेऱ्याही पुन्हा सुरू करण्यात आल्या आहेत.

जिंतूर आगारात प्रवाशांची संख्या मोठी असतानाही उपलब्ध बसगाड्यांची संख्या अपुरी पडत असल्याने काही मार्गांवरील फेऱ्या कमी कराव्या लागत होत्या. परिणामी प्रवाशांना मोठ्या गैरसोयीला सामोरे जावे लागत होते. मात्र, आता नवीन पाच गाड्या उपलब्ध झाल्याने परिस्थितीत सुधारणा झाली आहे.

आगार व्यवस्थापक आनंद चव्हाण आणि स्थानक प्रमुख रामेश्वर सोनवणे यांनी दिलेल्या माहितीनुसार, नवीन गाड्यांमुळे प्रवाशांच्या सेवेसाठी काही महत्त्वाच्या फेऱ्या पूर्ववत सुरू करण्यात आल्या आहेत.

यामध्ये किनगाव-लातूर, डिग्रस-परभणी, सायखेडा-परभणी, गडदगव्हाण-वझर-कवडा, तसेच दुपारची रिसोड-बामणी-कोठा या मार्गांचा समावेश आहे.

विशेषतः ग्रामीण भागातील प्रवाशांसाठी या फेऱ्या महत्त्वाच्या असल्याने त्या पुन्हा सुरू झाल्याने प्रवाशांना मोठा दिलासा मिळाला आहे. बसगाड्यांची कमतरता दूर झाल्याने वेळापत्रक सुरळीत होण्यास मदत होणार असून, जिंतूर तालुक्यातील प्रवासी वर्गातून समाधान व्यक्त होत आहे.