आमदार प्रशांत बंब यांचा दुष्काळ निवारण व पाणीटंचाईच्या प्रश्नांवर शेतकऱ्यांशी संवाद

शेतकऱ्यांच्या समस्या जाणून घेतल्या; पाणी जपून वापरण्याचे केले आवाहन, चारा छावणी सुरू करण्याबाबतही चर्चा

लोकार्थ प्रतिनिधी विजय चौधरी, खुलताबाद

तालुक्यातील दुष्काळी परिस्थिती, शेतकऱ्यांच्या अडचणी आणि आगामी काळात निर्माण होणारी पिण्याच्या पाण्याची टंचाई यासंदर्भात आज वडोद कान्होबा येथील कानिफनाथ मंदिर परिसरात आमदार प्रशांत बंब यांच्या प्रमुख उपस्थितीत बैठक घेण्यात आली. या बैठकीत गिरिजा मध्यम प्रकल्प परिसरातील शेतकऱ्यांसह तालुक्यातील विविध भागांतील शेतकऱ्यांशी संवाद साधून त्यांच्या समस्या जाणून घेण्यात आल्या.

यावेळी शेतकऱ्यांनी दुष्काळामुळे निर्माण झालेल्या अडचणी मांडल्या. आगामी काळात पिण्याच्या पाण्याची टंचाई भासण्याची शक्यता लक्षात घेऊन पाण्याचा जपून वापर करावा, असे आवाहन आमदार प्रशांत बंब यांनी उपस्थित शेतकऱ्यांना केले. तसेच जनावरांसाठी उपलब्ध असलेला चारा किती दिवस पुरेल, याचा आढावा घेऊन चारा संपण्यापूर्वी चारा छावणी सुरू करण्याच्या दृष्टीने नियोजन करावे. याबाबत शेतकऱ्यांनी परिस्थितीची माहिती व सूचना द्याव्यात, असेही त्यांनी सांगितले.

दुष्काळी परिस्थितीचा सामना करण्यासाठी प्रशासनाला सूचना

दुष्काळाची परिस्थिती गंभीर असून, या संकटाचा सामना करण्यासाठी सर्वांनी एकमेकांना सहकार्य करणे आवश्यक आहे. शेतकरी आणि सर्वसामान्य नागरिकांना दिलासा देण्यासाठी प्रशासनाने समन्वयाने काम करावे, असे आमदार बंब यांनी सांगितले.

तलाठी, ग्रामसेवक, कृषी सहाय्यक, शिक्षक तसेच इतर अधिकारी व कर्मचाऱ्यांनी मुख्यालयात राहून नागरिकांच्या समस्या समजून घ्याव्यात. दुष्काळामुळे निर्माण होणाऱ्या आव्हानांचा आढावा घेऊन त्यावर योग्य उपाययोजना कराव्यात, अशा सूचनाही त्यांनी संबंधित अधिकाऱ्यांना दिल्या. पाणीटंचाई, जनावरांच्या चाऱ्याची उपलब्धता आणि शेतकऱ्यांच्या अडचणी याबाबत प्रशासनाने सतर्क राहून आवश्यक नियोजन करावे, यावर बैठकीत भर देण्यात आला.

पदाधिकारी, अधिकारी व शेतकऱ्यांची उपस्थिती

या बैठकीस भारतीय जनता पक्षाचे जिल्हा उपाध्यक्ष प्रकाश वाकळे, जिल्हा परिषद सदस्य .रेखाताई प्रकाश चव्हाण, प्रतीक्षा विकास कापसे, भाजपाचे तालुकाध्यक्ष प्रकाश चव्हाण, संजय खंडागळे, दिनेश अंभोरे, नारायण बरडे, उपनगराध्यक्ष नवनाथ बारगळ, परसराम बारगळ, जिल्हा परिषदेचे माजी उपाध्यक्ष एल. जी. गायकवाड, विकास कापसे, ज्ञानेश्वर नलावडे, जिल्हा मध्यवर्ती सहकारी बँकेचे संचालक संदीप निकम, मुख्यमंत्री बळीराजा शेत पाणंद रस्ते योजनेचे सह अध्यक्ष अमोल गवळी, अरूण आघाडे, राहुल चव्हाण, सतीश खंडागळे यांच्यासह परिसरातील शेतकरी, विविध पदाधिकारी आणि कर्मचारी उपस्थित होते.