एचएआरसीच्या दिवाळी दानमहोत्सवाची यशस्वी सांगता; ४०० विद्यार्थ्यांना दिवाळी किटचे वाटप

हिंगोली जिल्ह्यातील ९६ विद्यार्थ्यांना मदत; निराधार महिलांना नवीन साड्यांची भेट

जवळा बाजार : समाजातील वंचित घटकांसोबत सणांचा आनंद वाटून घेण्याच्या सामाजिक बांधिलकीतून होमिओपॅथिक अकॅडमी ऑफ रिसर्च अँड चॅरिटीज (एचएआरसी), परभणी यांच्या वतीने आयोजित दिवाळी दानमहोत्सव २०२६ ची यशस्वी सांगता झाली. या अभियानांतर्गत परभणी आणि हिंगोली जिल्ह्यांतील एकूण ४०० एकल पालक व अनाथ विद्यार्थ्यांना दिवाळी किटचे वाटप करण्यात आले.

हिंगोली जिल्ह्यातील वसमत व औंढा तालुक्यांतील ९६ विद्यार्थ्यांना अनुसया मंगल कार्यालय, जवळा बाजार येथे आयोजित कार्यक्रमात दिवाळी किट देण्यात आले. तपोवन, कारंजाळा, असोला न. व., पुरजळ, असोला, टाकळ गव्हाण, वडद, अंजनवाडी, बोरी सा., कळंबा, सीरला, पोटा खु., करंजी, गुंडा, जवळा बा., सावंगी, हत्ता, अंजनवाडा आणि काठोडा तांडा येथील जिल्हा परिषद शाळांमध्ये इयत्ता पहिली ते सातवीत शिकणाऱ्या विद्यार्थ्यांना या उपक्रमाचा लाभ मिळाला. यावेळी निराधार महिलांनाही नवीन साड्यांची भेट देण्यात आली.

कार्यक्रमाच्या अध्यक्षस्थानी ज्येष्ठ नाट्य कलावंत रविशंकर झिंगरे होते. एचएआरसीचे अध्यक्ष डॉ. पवन चांडक, डॉ. श्रीनिवास केशट्टी, डॉ. राजकुमार भारुका, संजय लाहोटी, प्रकाश डुबे, संतोष बारबिंडे, अनुराज रासकटला, विठ्ठल शिंदे, प्रा. गजानन मुळे, त्रिवेणी गलांडे, संतोष चव्हाण आणि डॉ. गोविंद ढोबळे उपस्थित होते. प्रास्ताविक डॉ. श्रीनिवास केशट्टी यांनी केले. सूत्रसंचालन प्रकाश डुबे यांनी केले, तर आभार डॉ. राजकुमार भारुका यांनी मानले.

दिवाळी किटमध्ये फरसाण, मिठाई, साबण, सुगंधी तेल, उटणे, दंतमंजन, ब्रश, कंगवा आणि शेंगदाणा चिक्की आदी साहित्याचा समावेश होता. विद्यार्थ्यांमध्ये वाचनाची आवड निर्माण व्हावी, यासाठी बालभारती प्रकाशित ‘किशोर’ मासिकही भेट देण्यात आले.

डॉ. पवन चांडक यांची प्रतिक्रिया : “आई-वडिलांचे छत्र हरवलेल्या किंवा एकल पालकांच्या आधारावर वाढणाऱ्या मुलांच्या आयुष्यातही दिवाळीचा आनंद फुलावा, या भावनेतून या उपक्रमाचे आयोजन केले. दानशूर व्यक्ती, मित्रपरिवार, शिक्षक आणि स्वयंसेवकांच्या सहकार्यामुळे ४०० किट वाटपाचे उद्दिष्ट पूर्ण करता आले. ही केवळ वस्तुरूप मदत नसून गरजू मुलांना आपण समाजाचा महत्त्वाचा भाग आहोत, हा विश्वास देण्याचा प्रयत्न आहे. सहकार्य करणाऱ्या सर्वांचे मनःपूर्वक आभार.”

परभणी जिल्ह्यात ३०४ आणि हिंगोली जिल्ह्यात ९६, असे एकूण ४०० किटचे वाटप करून संस्थेने निर्धारित उद्दिष्ट शंभर टक्के पूर्ण केले.