तीस लाखाच्या खंडणीसाठी पवन चक्की कंपनीचे जेसीबी जाळून टाकण्याची धमकी

सुरक्षा रक्षकासह तिघा विरुद्ध खंडणीचा गुन्हा दाखल

लोकार्थ प्रतिनिधी गौतम बचुटे

केज :- तीस लाख रु. खंडणी द्या, अन्यथा तुमचे जेसीबी जाळून टाकू अशी धमकी देऊन आवादा पवन चक्की अधिकाऱ्यांना शिवीगाळ केल्या प्रकरणी कंपनीच्या सुरक्षा रक्षकासह त्याच्या आई वडिलांच्या विरुद्ध खंडणीचा गुन्हा करण्यात आल्याची घटना घडली आहे.

केज तालुक्यातील जिवाचीवाडी येथे सर्व्हे नं. ४९६, ४९७, ४९८, ४९९, ५०० येथील प्रभु नारायन सारूक व त्यांची पत्नी नामे प्रमिला प्रभु सारुक यांच्या शेतात आवादा एनर्जी प्रा. (लि.) कंपनीचे पवनचक्की उभारणीचे काम सुरू आहे.
दि. ३ नोव्हेंबर रोजी दुपारी १:३० वा चे सुमारास आवादा एनर्जीच्या पवन चक्की प्रकल्पावर काम करीत असलेले वरिष्ठ अधिकारी विशाल जयप्रकाश शेलार, दत्ता टिंगरे, अक्षय टेकाळे, नितीन कांबळे, पवनचक्कीचे काम करणारे मजूर हे पोलिस संरक्षणात जेसीबी घेऊन काम करण्यासाठी गेले असता; काम चालू असताना, तेथे प्रभाकर नारायण सारूक व त्यांची पत्नी सौ. प्रमिला प्रभाकर सारुक या दोघांनी काम बंद करून काम अडविले. त्यांना हजर असलेल्या अधिकाऱ्यांनी सांगितले की, त्यांच्या जमिनीचा मावेजा दिला असून काम अडवू नका. त्यावर त्यांनी पैसे मिळाले नाहीत. त्यांनी ३० लाख रु. आणि त्यांच्या मुलाला नोकरी देण्याची मागणी केली. तसेच जर त्यांची मागणी पूर्ण केली नाही तर कामावर असलेली जेसीबी जाळून टाकण्याची धमकी दिली. तसेच पोलिसा समक्ष कंपनीच्या अधिकाऱ्यांना शिवीगाळ करून जीवे मारण्याचा धमकी दिली.
या प्रकरणी वरिष्ठ अधिकारी विशाल जयप्रकाश शेलार यांच्या तक्रारी वरून प्रभाकर नारायण सारूक, त्यांची पत्नी सौ. प्रमिला प्रभाकर सारुक आणि त्यांचा मुलगा मच्छिंद्र प्रभाकर सारूक याच्या विरूद्ध गु. र. नं. ६९५/२०२६ भा. न्या. सं. १०८(२), ३५१(२), ३५२, ३(५) नुसार खंडणी आणि जिवे धमकी दिल्याचा गुन्हा दाखल झाला आहे.
पोलिस निरीक्षक राहुल सूर्यतळ यांच्या मार्गदर्शनाखाली पोलीस हेडकॉस्टेबल उमेश आघाव हे तपास करीत आहेत.

सुरक्षा रक्षका सुद्धा आरोपी :-
तीन आरोपी पैकी मच्छिंद्र सारूक हा आवादा कंपनीत सुरक्षा रक्षक म्हणून काम करीत आहे; मात्र त्याने त्याचे आई-वडिलांना फोन करून काम बंद करा. अशी फूस दिली. म्हणून त्याची विरुद्ध देखील गुन्हा दाखल करण्यात आला आहे. मार्गदर्शनाखाली पोलीस हेडकॉस्टेबल उमेश आघाव हे तपास करीत आहेत.