केज पोलीसांनी हरवलेले आणि चोरीला गेलेले ११ मोबाईल केले हस्तगत

लोकार्थ प्रतिनिधी गौतम बचुटे

केज:- केज पोलिसांनी हरवलेले आणि चोरीला गेलेले ११ मोबाईल सखोल तपास करून हस्तगत करून ते मूळ मालकांना परत करण्यात आले.
नागरीकांचे मोबाईल हरवले तसेच गहाळ झाले बाबत पोलीस ठाणे केज येथे मोबाईल गहाळ झाले बाबतचे प्राप्त झालेल्या तक्रारी संदर्भात जिल्हा पोलीस अधीक्षक नवनीत काँवत, अपर पोलीस अधीक्षक श्रीमती चेतना तिडके, सहायक पोलीस अधीक्षक वेंकटराम यांच्या मार्गदर्शनाखाली पोलिस निरीक्षक राहुल सूर्यतळ यांच्या अधिनिस्त असलेल्या स्थानिक डी बी पथकाचे सहाय्यक पोलिस निरीक्षक लक्ष्मण उंबरे आणि पोलिस निरीक्षक अमिरोद्दीन इनामदार, पोलिस हेडकॉन्स्टेबल बाळासाहेब अहंकारे, पोलिस कॉन्स्टेबल राहुल तरकसे, पोलिस कॉन्स्टेबल शिवाजी कागदे, पोलिस कॉन्स्टेबल नितीन वारे, पोलिस कॉन्स्टेबल संतोष गिते यांच्या पथकाने सी इ आय आर या अत्याधुनिक प्रणालीद्वारे ट्रेसिंगसाठी टाकून त्याचा सखोल तपास करून ते हस्तगत केले.
दि. ३० ऑक्टोबर रोजी ते मोबाईल मूळ मालकांशी संपर्क साधून त्यांना पोलिस ठाण्यात बोलावून ते त्यांच्या स्वाधीन करण्यात आले. या सर्व मोबाईलची किंमत सुमारे दोन ते अडीच लाखाच्या आसपास आहे.
या तपासामुळे मोबाईल हरवलेल्या मालकांच्या चेहऱ्यावरून आनंद ओसंडत होता. या तपासा बद्दल केज पोलिस आणि डी बी पथकाचे कौतुक होत आहे.