गंगापूरमध्ये युवती शक्तीचा जागर; ११०० विद्यार्थिनींचा उत्स्फूर्त सहभाग

शालिनी वर्मा यांचे ‘पंचपरिवर्तन’वर मार्गदर्शन; एपीआय विनायक पाटील यांनी दिले महिला सुरक्षेचे धडे

लोकार्थ प्रतिनिधी विजय बनसोड

गंगापूर : अखिल भारतीय विद्यार्थी परिषद (अभाविप) यांच्या वतीने गंगापूर येथे आयोजित युवती शक्ती संमेलनाला विद्यार्थिनींचा उत्स्फूर्त प्रतिसाद मिळाला. वाहेगाव, वरखेड, जामगाव आणि गंगापूर परिसरातील सुमारे ११०० विद्यार्थिनींनी या संमेलनात सहभाग नोंदवला. युवतींमध्ये आत्मविश्वास, सामाजिक जाणीव, नेतृत्वगुण आणि महिला सुरक्षेविषयी जागरूकता निर्माण करण्याच्या उद्देशाने आयोजित हे संमेलन उत्साहपूर्ण वातावरणात पार पडले.

संमेलनाला अभाविपच्या केंद्रीय कार्यसमिती सदस्य शालिनीताई वर्मा, सहाय्यक पोलीस निरीक्षक विनायक पाटील, वंडर किड्स इंग्लिश स्कूलच्या संचालिका सपना कटारिया आणि अभाविपच्या राष्ट्रीय कार्यकारिणी सदस्य सुकन्या बावस्कर यांची प्रमुख उपस्थिती होती.

कार्यक्रमाच्या प्रारंभी सुकन्या बावस्कर यांनी प्रास्ताविकातून संमेलनामागील भूमिका स्पष्ट केली. विद्यार्थिनींनी शिक्षणाबरोबरच सामाजिक प्रश्नांची जाणीव ठेवून सक्षम नेतृत्वासाठी पुढाकार घ्यावा, असे आवाहन त्यांनी केले.

पंचपरिवर्तनातून समाजबदलाचा संदेश

शालिनीताई वर्मा यांनी ‘पंचपरिवर्तन’ या विषयावर मार्गदर्शन करताना सामाजिक समरसता, कुटुंब प्रबोधन, पर्यावरणपूरक जीवनशैली, स्वदेशीचा स्वीकार आणि नागरिक कर्तव्यांचे पालन या पाच प्रमुख आयामांची माहिती दिली. समाजात सकारात्मक बदल घडवून आणण्यासाठी व्यक्तीपासून कुटुंबापर्यंत आणि कुटुंबापासून संपूर्ण समाजापर्यंत परिवर्तनाची प्रक्रिया महत्त्वाची असल्याचे त्यांनी सांगितले. समाजाच्या सर्वांगीण विकासासाठी युवक-युवतींनी या परिवर्तनात सक्रिय सहभाग नोंदवावा, असे आवाहनही त्यांनी केले.

महिला सुरक्षेबाबत पोलिसांचे मार्गदर्शन

सहाय्यक पोलीस निरीक्षक विनायक पाटील यांनी महिला सुरक्षा, कायद्यांविषयी जागरूकता, सायबर गुन्ह्यांपासून बचाव आणि अडचणीच्या प्रसंगी पोलिसांची मदत घेण्याबाबत विद्यार्थिनींना मार्गदर्शन केले. कोणत्याही अनुचित प्रकाराला घाबरून न जाता योग्य वेळी तक्रार करावी आणि स्वतःच्या सुरक्षिततेबाबत सतर्क राहावे, असे त्यांनी स्पष्ट केले.

या संमेलनामुळे विद्यार्थिनींना सामाजिक परिवर्तन, नेतृत्व आणि महिला सुरक्षा या महत्त्वपूर्ण विषयांवर मार्गदर्शन मिळाले. विविध गावांमधून मोठ्या संख्येने विद्यार्थिनींची उपस्थिती हे संमेलनाचे प्रमुख वैशिष्ट्य ठरले.

कार्यक्रमाचे सूत्रसंचालन पूजा मारकळ यांनी केले. यावेळी अभाविपचे विभाग संघटनमंत्री मंगेश ढगे, जिल्हा संयोजक राम उदे, सहसंयोजक सार्थक मुगुटे, शहरमंत्री यश वाघमारे, सहमंत्री रोहित राजपूत, तालुका संयोजक शिवम गाणार, सहसंयोजक अद्वाय कुलकर्णी, सोशल मीडिया संयोजक पवन मिसाळ, महाविद्यालय अध्यक्ष बाळासाहेब जाधव यांच्यासह अभिजित घाडगे, प्रणव तायडे, संजू दास, साई गिरी, पवन जांभळे, महेश तुपे, चैतन्य सुकाशे आणि अभाविपचे अन्य पदाधिकारी व कार्यकर्ते उपस्थित होते.