सतीश घाटगे पाटील यांच्या मध्यस्थीला यश; घुंगर्डे हादगावच्या ग्रामस्थांचे उपोषण मागे

शाळेच्या जागेवरील अतिक्रमण हटविण्याचे ग्रामपंचायतीचे लेखी आश्वासन

लोकार्थ प्रतिनिधी पंकज पवार

अंबड:अंबड तालुक्यातील घुंगर्डे हादगाव येथील जिल्हा परिषद शाळेसाठी २३ खातेदारांनी दानपत्राद्वारे दिलेल्या २७ गुंठे जागेवरील अतिक्रमण हटविण्याच्या मागणीसाठी उद्धवसिंग पवार यांच्यासह ग्रामस्थांनी आमरण उपोषण सुरू केले होते. समृद्धी साखर कारखान्याचे चेअरमन सतीश घाटगे-पाटील यांनी या प्रकरणात मध्यस्थी करून प्रशासनाकडे सातत्याने पाठपुरावा केल्याने उपोषणावर तोडगा निघाला. नायब तहसीलदार एकनाथ भोजने मंडळ अधिकारी प्रमोद काटकर यांच्या उपस्थितीत ग्रामपंचायत प्रशासनाने उपोषणकर्त्यांना लेखी आश्वासन दिल्यानंतर ग्रामस्थांनी दि. 30 ऑक्टोबर रोजी उपोषण मागे घेतले.

शाळेच्या जागेवरील अतिक्रमण हटवून विद्यार्थ्यांसाठी ती जागा उपलब्ध करून द्यावी, अशी ग्रामस्थांची मागणी होती. या प्रश्नावर घाटगे-पाटील यांनी तहसीलदार, भूमी अभिलेख विभाग आणि ग्रामपंचायत प्रशासनाला आवश्यक कार्यवाही करून तोडगा काढण्याच्या सूचना दिल्या होत्या. त्यानंतर ग्रामपंचायतीने लेखी आश्वासन दिले.

ग्रामपंचायतीच्या पत्रानुसार, गट क्रमांक २ मधील जागेची हद्द निश्चित करण्यासाठी भूमी अभिलेख कार्यालयात मोजणीकरिता १६ हजार रुपयांचे चलन भरण्यात आले आहे. भूमी अभिलेख विभागाकडून मोजणीची तारीख मिळताच प्रत्यक्ष मोजणी करून हद्द निश्चितीची कार्यवाही पूर्ण केली जाणार आहे. दरम्यान, २८ ऑक्टोबर रोजी गट क्रमांक २ मधील काही अतिक्रमण हटवून १०.५५ आर जागा ताब्यात घेण्यात आली आहे. उर्वरित जागेची हद्द निश्चित झाल्यानंतर तीही पूर्णपणे ताब्यात घेण्याची प्रक्रिया राबविण्यात येईल, अशी ग्वाही ग्रामपंचायतीने दिली आहे.

विद्यार्थ्यांच्या शैक्षणिक हितासाठी शाळेला दान मिळालेली संपूर्ण जागा अतिक्रमणमुक्त होणे आवश्यक आहे. उर्वरित जागाही पूर्णपणे अतिक्रमणमुक्त होईपर्यंत पाठपुरावा सुरू ठेवणार असल्याचा विश्वास सतीश घाटगे-पाटील यांनी ग्रामस्थांना दिला.