समृद्धी महामार्गावर भीषण अपघात.. दुसरबीड जवळ ८ ते १० वाहने एकमेकांवर आदळली…

ट्रकच्या धडकेने अनेक वाहनांचे मोठे नुकसान.. सुदैवाने जीवित हानी नाही…

लोकार्थ प्रतिनिधी अक्षय थिगळे

सिंदखेड राजा / बुलढाणा : महाराष्ट्राच्या समृद्धी महामार्गावर अपघातांचे सत्र थांबण्याचे नाव घेत नसून, पुन्हा एकदा भीषण अपघाताची घटना समोर आली आहे. बुलढाणा जिल्ह्यातील सिंदखेड राजा तालुक्यात तढेगावजवळ खडकपूर्णा नदीवरील पुलावर कंटेनरने अनेक वाहनांना जोरदार धडक दिली. या धडकेत तब्बल ८ ते १० वाहने एकमेकांवर आदळल्याने महामार्गावर वाहनांचा अक्षरशः चुराडा झाला. या भीषण अपघातात जवळपास ३० जण गंभीर जखमी झाल्याची प्राथमिक माहिती समोर येत असून, जखमींचा नेमका आकडा अद्याप स्पष्ट झालेला नाही.

प्राथमिक माहितीनुसार, समृद्धी महामार्गावरील खडकपूर्णा नदीच्या पुलावरून वाहने जात असताना एका भरधाव कंटेनरने समोरील वाहनांना जोरदार धडक दिली. कंटेनर अनेक वाहनांना धडक देत पुढे गेल्याने एकापाठोपाठ एक वाहने एकमेकांवर आदळली. काही क्षणांतच पुलावर अपघातग्रस्त वाहनांचा खच पडला. या धडकेत अनेक वाहनांचे मोठ्या प्रमाणात नुकसान झाले असून, अपघाताची भीषणता पाहता घटनास्थळी एकच खळबळ उडाली.

घटनेची माहिती मिळताच पोलीस आणि आपत्कालीन यंत्रणांनी तातडीने घटनास्थळी धाव घेतली. अपघातग्रस्त वाहनांमध्ये अडकलेल्या जखमींना बाहेर काढण्यासाठी बचावकार्य सुरू करण्यात आले. जखमींना तातडीने जवळच्या रुग्णालयात उपचारासाठी हलवण्यात आले आहे. काही जखमींची प्रकृती गंभीर असल्याची प्राथमिक माहिती आहे.