१७ मंडळांतील मागील वर्षाचा रखडलेला आणि यंदाचा पीक विमा आठ दिवसांत जमा करा!

स्वाभिमानी शेतकरी संघटनेचा जिल्हाधिकाऱ्यांना इशारा; अन्यथा कृषी विभाग व विमा कंपनीविरोधात बेमुदत रास्ता रोको आंदोलन छेडणार

परभणी : मागील वर्षीच्या खरीप हंगामातील १७ मंडळांतील रखडलेला पीक विमा आणि चालू वर्षातील खरीप पीक विम्याची रक्कम तातडीने शेतकऱ्यांच्या खात्यावर जमा करावी, या मागणीसाठी स्वाभिमानी शेतकरी संघटनेच्या वतीने गुरुवार, दि. १२ नोव्हेंबर रोजी जिल्हाधिकारी परभणी यांना निवेदन देण्यात आले. दोन्ही वर्षांचा पीक विमा आठ दिवसांच्या आत शेतकऱ्यांच्या खात्यावर जमा न झाल्यास कृषी विभाग आणि पीक विमा कंपनीच्या विरोधात बेमुदत रास्ता रोको आंदोलन छेडण्यात येईल, असा आक्रमक इशारा संघटनेने दिला आहे.
निवेदनात नमूद केल्यानुसार, मागील वर्षी खरीप हंगामात परभणी जिल्ह्यात अतिवृष्टीमुळे ओल्या दुष्काळासारखी परिस्थिती निर्माण झाली होती. त्यानंतर झालेल्या पीक कापणी प्रयोगामध्ये जिल्ह्यातील सर्व ५२ महसूल मंडळे पीक विम्यासाठी पात्र ठरल्याचा संघटनेचा दावा आहे. मात्र, ग्रीन वेट आणि ड्राय वेट या तांत्रिक वादाचा आधार घेत १७ मंडळांतील शेतकऱ्यांचा पीक विमा अद्यापही प्रलंबित ठेवण्यात आला आहे. संबंधित विमा कंपनीकडून वारंवार अपील दाखल करून विमा देण्यास टाळाटाळ केली जात असल्याचा आरोप संघटनेने केला आहे.
विशेष म्हणजे, मागील वर्षीच्या खरीप हंगामातील सोयाबीनसोबतच कापूस उत्पादक शेतकऱ्यांचाही पीक विमा अद्याप मिळालेला नाही. कृषी विभागातील अधिकारी आणि पीक विमा कंपनी यांच्यातील कथित संगनमतामुळे शेतकऱ्यांना त्यांच्या हक्काच्या विमा रकमेपासून वंचित राहावे लागत असल्याचा गंभीर आरोपही निवेदनातून करण्यात आला आहे.
दरम्यान, चालू वर्षीही अल निनोच्या प्रभावामुळे जिल्ह्यात पावसाचे प्रमाण कमी राहून कोरड्या दुष्काळाची परिस्थिती निर्माण झाली. खरीप हंगामातील पीक कापणी प्रयोग पूर्ण होऊनही अद्याप विमा कंपनीकडून शेतकऱ्यांच्या खात्यावर पीक विम्याची रक्कम जमा करण्यात आलेली नाही. एकीकडे निसर्गाच्या लहरीपणामुळे शेतकरी आर्थिक संकटात सापडला असताना दुसरीकडे विमा कंपनीकडूनही भरपाईसाठी प्रतीक्षा करावी लागत असल्याने शेतकऱ्यांमध्ये तीव्र नाराजी व्यक्त होत आहे.
मागील वर्षीच्या १७ मंडळांतील प्रलंबित पीक विम्याची रक्कम आणि चालू वर्षातील खरीप पीक विम्याची रक्कम अशा दोन्ही वर्षांची विमा भरपाई येत्या आठ दिवसांत शेतकऱ्यांच्या बँक खात्यांवर जमा करावी, अशी ठाम मागणी स्वाभिमानी शेतकरी संघटनेने जिल्हाधिकाऱ्यांकडे केली आहे. अन्यथा कोणतीही पूर्वसूचना न देता कृषी विभाग आणि पीक विमा कंपनीच्या विरोधात बेमुदत रास्ता रोको आंदोलन करण्यात येईल, असा स्पष्ट इशारा देण्यात आला आहे.
या निवेदनावर स्वाभिमानी शेतकरी संघटनेचे मराठवाडा अध्यक्ष किशोर ढगे, मुंजाभाऊ लोंडे, रामप्रसाद गमे, गजानन तुरे, किशन शिंदे, दत्तात्रय कदम, योगेश देशमुख, विकी जोंधळे, पंडित भोसले, नामदेव काळे, नागेश दुधाते, राम गोळेगावकर, माऊली शिंदे, उद्धव जवंजाळ आदींच्या स्वाक्षऱ्या आहेत