हिंगोली जिल्ह्याचा मान उंचावला! दाटेगाव ग्रामपंचायतीला एक कोटींचे बक्षीस

मुख्यमंत्री समृद्ध पंचायत राज अभियानांतर्गत विभागस्तरीय स्पर्धेत प्रथम क्रमांक; हिंगोली तालुक्याच्या शिरपेचात मानाचा तुरा

लोकार्थ प्रतिनिधी गोपाल सातपुते

हिंगोली : मुख्यमंत्री समृद्ध पंचायत राज अभियान सन २०२५-२६ अंतर्गत आयोजित विभागस्तरीय उत्कृष्ट ग्रामपंचायत स्पर्धेत हिंगोली तालुक्यातील दाटेगाव ग्रामपंचायतीने उल्लेखनीय यश संपादन केले आहे. या स्पर्धेत दाटेगाव ग्रामपंचायतीने प्रथम क्रमांक पटकावत तब्बल एक कोटी रुपयांचे बक्षीस मिळविले आहे. या यशामुळे हिंगोली जिल्ह्याच्या शिरपेचात मानाचा तुरा रोवला गेला आहे.

ग्रामविकास, स्वच्छता, पायाभूत सुविधा, लोकसहभाग, पारदर्शक प्रशासन आणि विविध शासकीय योजनांची प्रभावी अंमलबजावणी अशा विविध निकषांच्या आधारे या अभियानांतर्गत ग्रामपंचायतींचे मूल्यमापन करण्यात येते. या स्पर्धेत दाटेगाव ग्रामपंचायतीने उत्कृष्ट कामगिरी करत विभागस्तरावर अव्वल स्थान पटकावले.

या यशामुळे दाटेगाव गावाच्या विकासकामांना नवी दिशा मिळणार असून, एक कोटी रुपयांच्या बक्षिसातून गावातील विकासकामांना अधिक गती देण्याची संधी उपलब्ध होणार आहे.

दाटेगाव ग्रामपंचायतीच्या या यशाबद्दल सरपंच, उपसरपंच, ग्रामपंचायत सदस्य, ग्रामसेवक, कर्मचारी तसेच गावातील नागरिकांचे सर्व स्तरांतून अभिनंदन होत आहे. ग्रामस्थांच्या एकजुटीने आणि लोकसहभागातून साध्य झालेले हे यश जिल्ह्यातील इतर ग्रामपंचायतींसाठीही प्रेरणादायी ठरणार आहे.