सार्वजनिक वाहतूक, क्रीडा, शिक्षण आणि स्वच्छ ऊर्जा क्षेत्राला चालना; दुष्काळग्रस्तांसाठी ५९.१४ लाखांचा धनादेश
लोकार्थ प्रतिनिधी विजय देऊळगावकर
छत्रपती संभाजीनगर, दि. १ : शहराच्या विकासाला चालना देणाऱ्या विविध महत्त्वपूर्ण प्रकल्पांचे लोकार्पण मुख्यमंत्री देवेंद्र फडणवीस यांच्या हस्ते शनिवारी करण्यात आले. यामध्ये ३४ वातानुकूलित इलेक्ट्रिक बस, अत्याधुनिक सिंथेटिक ॲथलेटिक्स ट्रॅक, फुटबॉल मैदान, फ्लड लाईट्स, युवा वसतिगृह, ई-व्ही चार्जिंग स्टेशन, सौरऊर्जा प्रकल्प आणि मिटमिटा येथील आधुनिक शाळेच्या इमारतीचा समावेश आहे.
महानगरपालिका व स्मार्ट सिटीच्या माध्यमातून उपलब्ध झालेल्या ३४ इलेक्ट्रिक बस सोमवार, २ नोव्हेंबरपासून प्रवाशांच्या सेवेत दाखल होणार आहेत. नऊ मीटर लांबीच्या या बसमध्ये ३२ आसनांची व्यवस्था असून जीपीएस ट्रॅकिंग, डिजिटल तिकीट प्रणाली आणि जलद चार्जिंगची सुविधा आहे. तसेच कॅनॉट गार्डन व बाबा पेट्रोल पंप परिसरात ई-व्ही चार्जिंग स्टेशन उभारण्यात आले असून सिद्धार्थ उद्यानात १०० किलोवॅट क्षमतेचा सौरऊर्जा प्रकल्प सुरू करण्यात आला आहे.
विभागीय क्रीडा संकुल, गारखेडा येथे १२ कोटी ७५ लाख रुपये खर्चून आठ लेनचा ४०० मीटर सिंथेटिक ॲथलेटिक्स ट्रॅक आणि नैसर्गिक हिरवळीचे फुटबॉल मैदान विकसित करण्यात आले आहे. याशिवाय दहा हजार प्रेक्षक क्षमतेच्या स्टेडियममध्ये ८८ फ्लड लाईट्स आणि चार कोटी रुपये खर्चाचे युवा वसतिगृह उभारण्यात आले आहे. या सुविधांमुळे राष्ट्रीय व आंतरराष्ट्रीय स्तरावरील खेळाडू घडण्यास मदत होईल. या ट्रॅकवर सराव करणाऱ्या खेळाडूंमधून भविष्यात देशासाठी पदके जिंकणारे खेळाडू घडतील, असा विश्वास मुख्यमंत्री फडणवीस यांनी व्यक्त केला.
मिटमिटा येथील देवगिरी व्हॅली परिसरात २४ वर्गखोल्या, ग्रंथालय, संगणक कक्ष, विज्ञान प्रयोगशाळा आणि स्मार्ट क्लासरूम सुविधांनी युक्त शाळेच्या नवीन इमारतीचेही लोकार्पण करण्यात आले.
दरम्यान, दुष्काळग्रस्तांच्या मदतीसाठी महानगरपालिकेच्या वतीने मुख्यमंत्री सहाय्यता निधीला ५९ लाख १४ हजार रुपयांचा धनादेश सुपूर्द करण्यात आला.
यावेळी पालकमंत्री संजय शिरसाट, मंत्री अतुल सावे, खासदार संदिपान भुमरे, महापौर समीर राजूरकर, विभागीय आयुक्त जी. श्रीकांत, जिल्हाधिकारी विनय गौडा जी. सी., महापालिका आयुक्त अमोल येडगे यांच्यासह लोकप्रतिनिधी व अधिकारी उपस्थित होते.
No Comment! Be the first one.