ॲग्रीव्हिजनच्या १०व्या राष्ट्रीय अधिवेशनासाठी परभणीच्या तीन विद्यार्थ्यांची निवड

ओमकार डोके, समीक्षा सुतार आणि सिद्धी काशीकर करणार राष्ट्रीय व्यासपीठावर परभणी जिल्ह्याचे प्रतिनिधित्व

लोकार्थ प्रतिनिधी प्रवीण देशपांडे
अखिल भारतीय विद्यार्थी परिषद प्रणित ॲग्रीव्हिजनच्या १०व्या राष्ट्रीय अधिवेशनासाठी परभणी येथील तीन विद्यार्थ्यांची निवड झाली आहे. यामध्ये वसंतराव नाईक मराठवाडा कृषी विद्यापीठ, परभणी येथील कृषी महाविद्यालयाचा विद्यार्थी ओमकार डोके, तसेच अन्न तंत्रज्ञान महाविद्यालय, परभणी येथील विद्यार्थिनी समीक्षा सुतार आणि सिद्धी काशीकर यांचा समावेश आहे. हे तिन्ही विद्यार्थी नवी दिल्ली येथे आयोजित राष्ट्रीय अधिवेशनात सहभागी होत असून परभणी जिल्ह्याचे प्रतिनिधित्व करत आहेत.

दि. १३ व १४ ऑक्टोबर २०२६ रोजी भारतरत्न सी. सुब्रमण्यम सभागृह, भारतीय कृषी संशोधन परिषद, पुसा, नवी दिल्ली येथे या अधिवेशनाचे आयोजन करण्यात आले आहे. विद्यार्थी कल्याण न्यास, भोपाळ आणि भारतीय कृषी संशोधन परिषद, कृषी शिक्षण विभाग, नवी दिल्ली यांच्या संयुक्त विद्यमाने हे अधिवेशन आयोजित करण्यात आले आहे.
पारंपरिक कृषी ज्ञान आणि आधुनिक तंत्रज्ञानाच्या समन्वयातून भारतीय कृषी क्षेत्राची नव्याने उभारणी, ही या अधिवेशनाची मुख्य संकल्पना आहे. भारतीय कृषी क्षेत्रातील बदलते तंत्रज्ञान, संशोधन, नवोपक्रम आणि शाश्वत विकासाच्या दृष्टीने या अधिवेशनाला विशेष महत्त्व आहे.

या राष्ट्रीय अधिवेशनासाठी देशभरातील विविध कृषी विद्यापीठांचे कुलगुरू, ज्येष्ठ शास्त्रज्ञ, कृषी क्षेत्रातील तज्ज्ञ, संशोधक आणि विद्यार्थी उपस्थित आहेत. वसंतराव नाईक मराठवाडा कृषी विद्यापीठ, परभणीचे कुलगुरू डॉ इंद्रमणी हेदेखील या अधिवेशनासाठी उपस्थित आहेत. देशभरातील कृषी शिक्षण आणि संशोधन क्षेत्रातील मान्यवरांच्या उपस्थितीमुळे या अधिवेशनाला विशेष महत्त्व प्राप्त झाले आहे. या राष्ट्रीय व्यासपीठाच्या माध्यमातून ओमकार डोके, समीक्षा सुतार आणि सिद्धी काशीकर यांना कृषी क्षेत्रातील मान्यवरांशी संवाद साधण्याची, संशोधनातील नवीन दिशा जाणून घेण्याची आणि आधुनिक कृषी तंत्रज्ञानाविषयी माहिती मिळविण्याची संधी मिळत आहे.
या राष्ट्रीय अधिवेशनात शेतकऱ्यांचे उत्पन्न वाढविणे, देशाची अन्न व पोषण सुरक्षा मजबूत करणे, कृषी क्षेत्रातील नवोपक्रम आणि स्टार्टअप्सना प्रोत्साहन देणे, डिजिटल तंत्रज्ञानाचा वापर, पशुसंवर्धन, दुग्धव्यवसाय आणि कृषी शिक्षणाचे भविष्य अशा विविध महत्त्वपूर्ण विषयांवर विचारमंथन होणार आहे.

देशभरातील कृषी विद्यार्थी, संशोधक आणि कृषी क्षेत्रातील तज्ज्ञांना एकत्र आणणाऱ्या या अधिवेशनाच्या माध्यमातून विद्यार्थ्यांना कृषी क्षेत्रातील आधुनिक तंत्रज्ञान, संशोधनाच्या नवीन दिशा आणि रोजगाराच्या विविध संधी जाणून घेता येणार आहेत. तसेच देशाच्या विविध भागांतून आलेल्या विद्यार्थ्यांशी संवाद साधून आपल्या कल्पना व अनुभवांची देवाणघेवाण करण्याची संधी मिळणार आहे.

कृषी शिक्षण आणि संशोधनासाठी महत्त्वपूर्ण ओळख असलेल्या परभणी जिल्ह्यातील विद्यार्थ्यांची राष्ट्रीय अधिवेशनासाठी निवड होणे ही जिल्ह्यासाठी अभिमानाची बाब आहे. कृषी आणि अन्न तंत्रज्ञान क्षेत्रात शिक्षण घेणाऱ्या या विद्यार्थ्यांना राष्ट्रीय स्तरावर आपल्या जिल्ह्याचे प्रतिनिधित्व करण्याची संधी मिळाली आहे.

ओमकार डोके, समीक्षा सुतार आणि सिद्धी काशीकर यांच्या या निवडीबद्दल अभिनंदन व्यक्त करण्यात येत असून, त्यांच्या राष्ट्रीय अधिवेशनातील सहभागामुळे परभणी जिल्ह्याच्या शैक्षणिक क्षेत्राची ओळख राष्ट्रीय स्तरावर अधिक दृढ होण्यास मदत होणार आहे.