कळमनुरीच्या अराठीत दुष्काळाची दाहकता; मंत्री बावनकुळे यांच्याकडून पीक नुकसानीची प्रत्यक्ष पाहणी

लोकार्थ प्रतिनिधी मदन पाटील

हिंगोली जिल्ह्यात यंदा पावसाने मोठी ओढ दिल्याने कोरड्या दुष्काळाची भीषण परिस्थिती निर्माण झाली आहे. या पार्श्वभूमीवर राज्याचे महसूल मंत्री मा. ना. श्री. चंद्रशेखर बावनकुळे यांनी आज हिंगोली जिल्ह्याचा दौरा करत दुष्काळग्रस्त भागाची पाहणी केली.

कळमनुरी तालुक्यातील मौजे अराठी (कोरडा) येथे मंत्री महोदयांनी थेट शेताच्या बांधावर जाऊन पीक नुकसानीची पाहणी केली. यावेळी त्यांनी शेतकऱ्यांशी संवाद साधून त्यांच्या व्यथा जाणून घेतल्या. हातातोंडाशी आलेले सोयाबीन, कापूस व तूर पीक पावसाअभावी करपून गेल्याने शेतकरी मोठ्या आर्थिक संकटात सापडला आहे.

यावेळी बोलताना मंत्री बावनकुळे म्हणाले, “शासन शेतकऱ्यांच्या पाठीशी खंबीरपणे उभे आहे. एकही शेतकरी मदतीपासून वंचित राहणार नाही. जिल्हा प्रशासनाने तात्काळ पंचनामे करून अहवाल शासनाला सादर करावा आणि दुष्काळग्रस्त शेतकऱ्यांना तातडीची आर्थिक मदत, पीक विमा व इतर शासकीय योजनांचा लाभ मिळवून द्यावा.”

या पाहणी दौऱ्यावेळी सार्वजनिक आरोग्य राज्यमंत्री मेघना साकोरे-बोर्डीकर, खासदार रामराव वडकुते, आमदार संतोष बांगर, आमदार प्रज्ञा सातव, आमदार किसानराव वानखेडे, भाजप जिल्हा समन्वयक नितीन भुतडा यांच्यासह भाजप, शिवसेनेचे पदाधिकारी, महसूल विभागाचे अधिकारी व मोठ्या संख्येने शेतकरी उपस्थित होते.