जालना जिल्ह्यातील पैसेवारी ५० पैशांच्या आत; शेतकऱ्यांच्या अडचणी वाढल्या

971 गावांपैकी 965 गावांची पैसेवारी 50 पैशांपेक्षा कमी

लोकार्थ प्रतिनिधी विजय सोनवणे भोकरदन

जालना जिल्ह्यात यंदाच्या खरीप हंगामावर पावसाच्या लहरीपणाचा मोठा परिणाम झाला असून, पिकांची अपेक्षित वाढ आणि उत्पादनावर परिणाम झाल्याचे चित्र आहे. त्यातच जिल्ह्यातील पिकांची पैसेवारी ५० पैशांच्या आत आल्याची माहिती समोर आली आहे. त्यामुळे शेतकऱ्यांमध्ये चिंतेचे वातावरण निर्माण झाले आहे.
जिल्हाधिकारी आशिमा मित्तल यांनी विभागीय आयुक्त, छत्रपती संभाजीनगर यांना सादर केलेल्या अहवालावरून ही माहिती समोर आली आहे. जिल्ह्यातील सरासरी पैसेवारी ४०.३१ पैसे इतकी नोंदवली गेली आहे.
पैसेवारी ५० पैशांच्या आत येणे म्हणजे संबंधित भागातील पीक परिस्थिती समाधानकारक नसल्याचे प्रशासनाच्या पीक पाहणीच्या निकषांतून दिसून येते. कमी पाऊस, पावसातील खंड, जमिनीतील ओलावा कमी होणे आणि पिकांच्या वाढीवर झालेला परिणाम यामुळे उत्पादनात घट होण्याची शक्यता आहे.
जालना जिल्ह्यातील मोठा भाग शेतीवर अवलंबून असून खरीप हंगामात कापूस, सोयाबीन, मका, तूर यांसह विविध पिकांची लागवड केली जाते. जिल्ह्याच्या अर्थव्यवस्थेत कृषी क्षेत्राचे महत्त्व मोठे आहे. ५० पैशांच्या आत पैसेवारी आल्याने शेतकऱ्यांना शासनाकडून मिळणाऱ्या संभाव्य सवलती, मदत व नुकसानभरपाईच्या उपाययोजनांकडे आता लक्ष लागले आहे. याबाबत शासन आणि प्रशासनाकडून पुढील निर्णय काय घेतला जातो, याकडे जिल्ह्यातील शेतकऱ्यांचे लक्ष आहे.
खरीप हंगाम 2026-27 मध्ये पावसातील खंड आणि पिकांवर झालेल्या परिणामाची गंभीरता जालना जिल्ह्याच्या सुधारित हंगामी पैसेवारीतून स्पष्ट झाली आहे. जिल्ह्यातील 971 गावांपैकी 965 गावांची पैसेवारी 50 पैशांपेक्षा कमी जाहीर करण्यात आली आहे. उर्वरित 6 गावांची पैसेवारी जाहीर करण्यात आलेली नाही. जिल्ह्याची एकूण सुधारित पैसेवारी 40.31 पैसे आली आहे. जिल्ह्यातील सर्व आठही तालुक्यांची पैसेवारी 50 पैशांपेक्षा कमी आहे. त्यामुळे खरीप पिकांच्या उत्पादनावर मोठा परिणाम झाल्याचे या आकडेवारीतून दिसून येते. यातील घनसावंगी तालुक्याची पैसेवारी सर्वात कमी 28.64 पैसे आहे. त्यानंतर अंबड 35.59 पैसे आहे. जाफ्राबादची पैसेवारी 47.33 पैसे असून आठही तालुके 50 पैशांच्या खाली आहेत. उर्वरित ६ गावे बेचिराग/निरांक असल्यामुळे तेथे पैसेवारी प्रसिद्ध करण्यात आलेली नाही.
जिल्ह्यात खरीप पिकांचे सर्वसाधारण क्षेत्र सुमारे 6.19 लाख हेक्टर असल्याची माहिती जिल्हा परिषद कृषी विभागाने दिली आहे. तसेच सप्टेंबरमध्ये पावसातील खंडामुळे खरीप पिकांवर परिणाम झाल्याचे दिसून आले आहे.