अपघातात मृत अंगणवाडी सेविकेच्या कुटुंबीयांचे सीईओ मिनू पी. एम. यांनी केले सांत्वन

लोकार्थ प्रतिनिधी विजय बनसोड

रविवारची सुट्टी बाजूला ठेवून जामगावला भेट; दुःखाच्या प्रसंगी दाखवलेल्या संवेदनशीलतेचे ग्रामस्थांकडून कौतुक

लोकार्थ प्रतिनिधी विजय बनसोड

गंगापूर प्रशासकीय कामकाजाच्या व्यापातून आणि रविवारच्या साप्ताहिक सुट्टीतून वेळ काढत छत्रपती संभाजीनगर जिल्हा परिषदेच्या मुख्य कार्यकारी अधिकारी (सीईओ) मिनू पी. एम. यांनी जामगाव येथे भेट देऊन अपघातात मृत्यू झालेल्या अंगणवाडी सेविका अंजली कैलास तुपलोंढे यांच्या कुटुंबीयांचे सांत्वन केले. दुःखाच्या प्रसंगी कुटुंबीयांच्या पाठीशी उभे राहत त्यांनी दाखवलेल्या संवेदनशीलतेचे ग्रामस्थांकडून कौतुक करण्यात आले.

वैजापूर-गंगापूर मार्गावरील मुद्देशवाडगाव फाट्याजवळ शुक्रवारी (ता. २३) दुपारी भीषण अपघात झाला होता. इलेक्ट्रिक स्कूटीवरून गंगापूरकडे परतत असताना ट्रॅक्टरने धडक दिल्याने अंजली कैलास तुपलोंढे यांचा जागीच मृत्यू झाला. त्या अवघ्या महिनाभरापूर्वीच अंगणवाडी सेविका म्हणून सेवेत रुजू झाल्या होत्या. शिवराई येथील नातेवाइकांना भेटून परतत असताना त्यांच्यावर काळाने घाला घातला. या दुर्दैवी घटनेमुळे तुपलोंढे कुटुंबावर दुःखाचा डोंगर कोसळला आहे.

तरुण वयात अंजली यांचे अकाली निधन झाल्याने कुटुंबीयांना मोठा मानसिक धक्का बसला आहे. या दुःखद प्रसंगी त्यांना आधार देण्यासाठी सीईओ मिनू पी. एम. यांनी रविवारी (ता. २५) सायंकाळी जामगाव येथे जाऊन तुपलोंढे कुटुंबीयांची भेट घेतली. त्यांनी कुटुंबीयांची आस्थेने विचारपूस करून त्यांचे सांत्वन केले.

यावेळी जिल्हा परिषदेच्या महिला व बालविकास विभागाच्या उपमुख्य कार्यकारी अधिकारी मंगल पांचाळ, बालविकास प्रकल्प अधिकारी कल्पना देशमुख, पर्यवेक्षिका मनीषा सोनवणे, शाळा व्यवस्थापन समितीचे अध्यक्ष विनोद बनसोडे, मुख्याध्यापक प्रसाद शिंगारे, सहशिक्षक हारदे व भापकर यांच्यासह परिसरातील अंगणवाडी सेविका, मदतनीस आणि ग्रामस्थ उपस्थित होते.

दुःखाच्या प्रसंगी प्रशासकीय अधिकारी स्वतः कुटुंबीयांच्या भेटीसाठी आल्याने ग्रामस्थांनी समाधान व्यक्त केले.