कन्नड तालुक्यातील पाणी तालुक्याच्या बाहेर जाऊ देणार नाही-माजी आमदार हर्षवर्धन जाधव यांचा प्रशासनाला थेट इशारा

पिशोर नाक्यापासून तहसीलवर धडक मोर्चा.

लोकार्थ प्रतिनिधी कार्तिक राजगुरू

कन्नड-सोयगाव मतदारसंघातील धरणांचे पाणी तालुक्याबाहेर जाऊ देणार नाही, हे पाणी आमच्या मतदारसंघातील नागरिकांना आणि पशुधनालाच प्राधान्याने मिळाले पाहिजे, असा घणाघाती इशारा माजी आमदार हर्षवर्धन दादा जाधव यांनी प्रशासनाला दिला आहे. या मागणीसाठी आज शुक्रवार दि. ३० ऑक्टोबर रोजी पिशोर नाका कन्नड ते तहसील कार्यालयावर त्यांच्या नेतृत्वाखाली भव्य धडक मोर्चा काढण्यात आला.
सकाळी १० वाजता पिशोर नाका येथून या मोर्चाला सुरुवात झाली. यावेळी कन्नड तालुक्यातील कानाकोपऱ्यातून हजारो शेतकरी, शेतमजूर, पशुपालक आणि नागरिक मोठ्या संख्येने या मोर्चात सहभागी झाले होते.
धरणात पाणी, पण शेतकऱ्याच्या घशाला कोरड हर्षवर्धन जाधव कडाडले.
तहसील कार्यालयासमोर झालेल्या जाहीर सभेत बोलताना हर्षवर्धन दादा जाधव म्हणाले, “गेल्या तीन महिन्यांपासून कन्नड तालुक्यात पावसाचा एक थेंबही पडलेला नाही. ऑगस्टनंतर दुष्काळाने तोंड पसरले आहे. जमिनीत ओल नाही, विहिरी, बोअरवेल कोरड्या पडल्या आहेत. जनावरांना प्यायला पाणी नाही, माणसांना टँकरने पाणी पुरवले जात आहे. अशा परिस्थितीत आमच्या तालुक्यातील अंबाडी, शिवना, नागद, गडदगड या धरणांचे पाणी प्रशासनाने बाहेरच्या तालुक्याला किंवा उद्योगांना द्यायचे ठरवले तर आम्ही ते कदापिही खपवून घेणार नाही.
मतदारसंघातील नागरिकांचा आणि पशुधनाचाच या पाण्यावर पहिला अधिकार आहे. प्रशासनाने जर तालुक्यातील पाणी बाहेर सोडण्याचा प्रयत्न केला, तर रस्त्यावर उतरून पाण्याचे कंटनेर अडवू,असा इशाराही यावेळी जाधव यांनी दिला.
या मोर्चाच्या माध्यमातून तहसीलदारांना निवेदन देण्यात आले. या निवेदनात प्रमुख मागण्या करण्यात आल्या आहेत –
कन्नड तालुक्यातील सर्व धरणांचे पाणी राखीव ठेवून ते फक्त कन्नड-सोयगाव मतदारसंघातील नागरिक, शेती आणि पशुधनासाठीच वापरावे.यावेळी तालुक्यातील नागरीक मोठ्या संख्येने उपस्थित होते.